Shillong, K’lyngkot 30
Ka kynhun ki nongïalam ka BJP na Meghalaya hapoh ka jingïalam u MLA Bah Sanbor Shullai ka la ïakynduh ïa u Myntri ka tnat ïada ri u Rajnath Singh ha New Delhi ha kaba la pynsngew ha u halor ka jingdonkam ban ïoh ïa ki jaka shipai ha nongbah Shillong khnang ban ïoh shna surok bad ki jaka ïeng kali ki ban ïarap weng ïa ka jingkhapngiah.
Kiba la synran lang ïa u Bah Sanbor ki long u President ka BJP, Rikman G. Momin, Vice President u Bernard Marak nalor kiwei pat kiba donlang ha ka jingïakynduh bad u Rajnath Singh.
Ha kane ka jingïakynduh, kine ki Nongïalam ka BJP ki la ïoh ban ïatai sani bad u Myntri halor ka jingdonkam ïa ki jaka jong ki shipai kiba hap hapoh ka jingkhmih jong ka Defence Ministry kiba don ha nongbah Shillong, ka ban long ka jingïarap ha ka ban weng bad pynduna ïa ka dheng kali.
Ki jaka ba kham kongsan kaba ki la ïoh ban pynpaw ki kynthup ïa ka Lady Keane Road ban mih sha Police Bazar, ka Shillong Peak Road, ka Umpling Bridge Road ban mih sha Chief Engineer Office, Shillong bad ka lynti ïaid kjat hajan ka Anjali Cinema Hall.
U Bah Sanbor uba dei u MLA ka BJP na South Shillong constituency u la ong ba ki jaka kum ka surok Lady Keane kaba mih sha Khyndai Lad (Police Bazar), ka surok sha Lum Shyllong, ka surok bad jingkieng Umpling kaba hajan Chief Engineer Office Shillong bad lynti ïaid kjat hajan Anjali Cinema Hall ki dei kiba lah ban ksam lyngba ki jaka kiba hap ha ka jingpeit jingkhmih ki shipai hapoh ka tnat ïada ri.
U Bah Sanbor u la ong ba lada kine ki surok la shah ban pyndonkam ki paidbah ban ïaid kali ha ryngkat ki jingker pud kan long ka jingïarap ban weng ïa ka jingkhapngiah ki surok ha Shillong.
U la ong ruh ba ki jaka kum na thaiñ Umsohsun sha Rhino yn lah ban pyndonkam na ka bynta ban shna jaka ïeng kali ka ban ïarap pynduna ïa ka dheng kali hajan Khyndai Lad.
Shuh shuh u Bah Sanbor u la ong ba ka jaka hajan Anjali Cantonment Beat House lah ban pyndonkam ban shna jaka ïeng kali bad jaka shong kiba die madan ha kaba yn shim jaka da kaba siew bai jaka da kaba ïaid katkum ki kyndon jong ka tnat ïada ri haba don ka jingshim jaka.
Na ka liang u Myntri ka tnat ïada ri u la kular ban shimkhia ïa kane ha kaba ka BJP Meghalaya ruh kan ïai buddien haduh ban da lah ban pynbeit ïa kane.
U Bah Sanbor u la ong ba shen ka kynhun BJP Meghalaya kan sa ïakynduh ïa u Myntri Rangbah ka Jylla na ka bynta ban kyrpad ruh ban thaw ïa ka state level committee ka ban peit ban khmih ïa kane ka jingdonkam ban shim jaka na ki shipai kiba don ha nongbah Shillong.
