Nongpoh, K’lyngkot 30
Ka jingthep kyrteng ban ïa aireng ïa ka ilekshon MDC ka ban sa long ha ka 21 tarik u Rymphang ka la poi sha ka sngi kaba lai ha ka 30 tarik mynta u bnai. Haba phai sha Ri-Bhoi District ki la don haduh hynñiew ngut ki kyrtong na ki seng saiñ pyrthei bapher bapher kiba la pyndep ban thep kyrteng.
Na ki hynñiew ngut ba la thep kyrteng, ar ngut ki dei ki kyrtong ka National Peoples’ Party (NPP) ba kynthup ïa u Bah Rangkynsai Kharbuki na Umroi konstitwensi bad u Bah Joplin Sten na Mawhati konstitwensi kiba pyndep ban thep kyrteng hakhmat ki Returning Officer ka ophis u Deputy Commissioner ka Ri Bhoi District.
Katba san ngut ki kyrtong kiba la pyndep ka jingthep kyrteng ki dei na ka Congress bad kine ki kynthup ïa u Bah Lawrence Nongrum na Nongpoh konstitwensi, u Bah Rocky A Marweiñ na Umsning konstitwensi, u Bah Dominic Mynsong na Mawhati konstitwensi, u Bah Victor Rani na Jirang konstitwensi lem bad u Bah MD Syiem na Umroi konstitwensi.
Haba kren sha ki lad pathai khubor, u MDC ba mynta ka NPP na Umroi konstitwensi, u Bah Rangkynsai Kharbuki u la pynpaw ba lada ki paidbah ki ibit ban jied biang ïa u kum u MDC bad lyngba ka jingmynjur lang jong kiwei pat ki paralok MDC, u don ïa ka jingthrang ban pynduh noh ïa ka Tangjait naba u kwah ban don beit tang ki Khasi paka.
U Bah Rangkynsai u la ong ba ka jingshongkha khleh jong ki khun Khasi ha kine ki sngi kiba mynta ka la ktah eh bad katkum ka jingsngew shimet ka jong u, lada baroh ki MDC ynda ki la jop biang, u don ïa ka jingthmu ban pynduh noh wat ïa ka Tangjait ruh namar ka jingailad ban Tangjait na kiwei kiwei ki jaidbynriew sha ka jaidbynriew Khasi, ka ktah ïa ka snam Khasi bad na ka liang jong u, u kwah ban don beit tang ki Khasi paka.
U Bah Joplin Sten, kyrtong NPP na Mawhati u la ong ba kam da donkam than ban peit ïa ka seng naba ynda la jop kam don satia ka aiñ kyntiap seng hapoh ka District Council, hynrei ka bynta kaba hakhmat hi ka long ban buh ïa ka thong kumno ban trei na ka bynta ka ri bad ka jaidbynriew.
Katba na ka liang ki kyrtong ka Congress pat ki la pynpaw ïa ka jingkyrmen kaba skhem ba kin ïoh ïa ka jingjop ha kane ka kynti kumba ki paidbah hi ki dang don ïa ka jingshaniah ha ka Congress ban trei na ka bynta ban ïada ïa ka hok ka sot jong ki rit paid bad ruh khamtam ban ïada bad pynneh pynsah ïa ka khyndew ka shyiap, ka riti ka dustur bad kiwei kiwei kiba kum ka jaidbynriew ka donkam eh hakhmat.
