Shillong, K’lyngkot 30
Ka Central Bureau of Communication, Shillong ka la pynlong ar tylli ki prokram ai jingtip sha-phang ka jingktah jong ka jingpyndonkam ïa ki jingdih pynbuaid hapoh ka kam NashaMukt Bharat Abhiyan. Kane ka sienjam ba la pynlong ha Pathew bad Markasa ha Eastern West Khasi Hills, ka thmu ban ai jingtip ïa ki nongïashim bynta shaphang ka jingkiew ka jingpyndonkam ïa ki jingdih pynbuaid bad kumno kane ka ktah ïa ka koit ka khiah.
Ka prokram kaba nyngkong ka dei kaba la pynlong ha Parïong PHC ha ka shnong Pathew ha kaba ki nongshong shnong ki la ïalum ha ka por mynstep ba la ïalam da u Rangbah Shnong Bah A Marngar. U Dr. LSL Kharkongor, in-charge ka PHC u la kren shaphang ka jingkhuslai jong u shaphang ka jingpur ka jingpyndonkam ïa ki drok ha kane ka thaiñ bad u la batai shaphang ka jingktah jong kane ka kam kaba sniew. “Ka jingdih drok kam dei ka jingeh shimet, ka ktah ïa ka longïing, ka shnong bad ka imlang sahlang,” u la ong. U Dr. Kharkongor u la ban jur halor ka jingdonkam ïa ki sienjam ba pura kiba peit bniah ïa ka jingai jingsumar bad ruh ka jingïada ha ryngkat ki prokram ai jingtip.
U Bah E Marbaniang, SI ka thanat Mairang u la kren shaphang ka jingdih drok bad ki sienjam ban ïada na kane. U Bah Marbaniang u la kren ruh shaphang ki jingktah ka jingdih drok, ki jingpynshitom katkum ka aiñ bad ka jingdonkam ïa ki kmie ki kpa ba kin peit bha ïa la ki khun. U la ong ba ka jingdih ïa ki drok kum u opium, kynja bad kiwei kiwei ki jait ka ktah bha ïa ka jingim. Ka jingdih drok ka ktah ïa ka jingmut jingpyrkhat bad ka koit ka khiah. U la ong ba khnang ban lait na ki jingktah jong ka jingdih drok, dei ban sngewthuh ïa la ki jong ki jingbahkhlieh bad don ka jingim kaba koit ba khiah.
U la ong ba khnang ban weng ïa ka jingma jong ki drok na ka imlang sahlang, ka long kaba donkam ban ïoh ïa ka jingïatreilang jong ki paidbah bad u la ban jur ba ki briew ki dei ban ai jingtip shaphang kito kiba la ngop ha u drok bad kino kino kiba die drok ha ki thaiñ jong ki khnang ba ki pulit ki lah ban shim kloi ïa ki sienjam.
Kane ka kam jong ka Bureau ka long shi bynta ka kam kaba kham ïar jong ka Sorkar ban ïaleh pyrshah ïa ka jingngop ha ki drok bad wanrah ïa ka imlang sahlang kaba lait na ki drok lyngba ka jingai jinghikai, ka jingshim ïa ki sienjam bad ki kam jong ka imlang sahlang.
La ïakren ruh shaphang ka jingkongsan jong ka jingkhuid jingsuba ha kane ka prokram hapoh ka mat Swachhata Hi Sevada ka Kong Susanna L Lyngkhoi, Block Coordinator SBMG Mawthadraishan Block. Ka Kong Lyngkhoi ka la ban jur halor ka jingkongsan jong ka jingpynsangeh ïa ka jingthang ïa ki ñiut plastik. Ka la kren sani ruh shaphang ka jingdonkam ban tih ïa ki thliew paiñkhana, bad ka jingbahkhlieh jong ki briew ban pynthikna ïa ka jingkhuid jingsuba.
Kum kane ka prokram la pynlong ha ka Dorbar hall jong ka Community Hall ha ka shnong Markasa da ka jingthmu ban kyntiew ïa ka jingkhuid jingsuba bad ka jingïaleh pyrshah ïa ka jingpyndonkam ïa ki drok. U nonghikai ka skul Markasa Sec. School, Bah DL Marsianbai u la ïaroh ïa ki sienjam jong ka CBC Shillong kaba la pynlong ïa kum kine ki prokram ai jingtip ha ki shnong ba kham jngai kum ka Markasa bad ba kam pynlong ïa ki prokram tang ha ki jaka sor.
U Bah Marsianbai u la ong haba u briew u ngop ha ki jingdih pynbuaid, um buh jingma tang ïa ka jingim lajong hynrei ka ktah ruh ïa baroh kawei ka longïing, ka shnong bad ka imlang sahlang. U la kyntu ban don ka jingbteng jong ka jingkyrshan ïa baroh ki briew ha ka imlang sahlang kaba peit ïa ki jingktah ki jingdih pynbuaid ïa ki briew bad ka imlang sahlang.
Ka Bureau ka la pynlong ruh ïa ki jingïakop shad bad kob kyntip kum shi bynta kane ka prokram bad ki nongjop ki la ïoh ïa ki buskit song tyngka. Ki nongjop jong ka jingïakop shad ki long -ba nyngkong Albansa L Marshillong, ba ar Jubarihun Ïawphniaw, ba lai Dathewlang L Lyngkhoi bad ba saw Daphin Sharai Ïawphniaw.
Ka la don ruh ka jingthung dieng hapoh ka kam EkPed MaaKeNaam. La pynlong ruh ïa ka jingpynkhuid shnong bad hadien kane ka la don ka jingai jingkren sngewnguh da u Bah Josephas Thongni.
