Shillong, K’lyngkot 30
Ka Kynhun Myntri jong ka Sorkar MDA ha ka Sngi Palei ka la shim ïa ka rai ban aiti noh sha ka tnat Community and Rural Development (C&RD) ban pyntreikam ïa ka Swachh Bharat Mission Gramin Plus (SBMGP) kaba baroh shikatta la pyntreikam da ka tnat Public Health Engineering (PHE).
Haba kren sha ki lad patahi khubor hadien ka jingïalang jong ka Kynhun Myntri, u Myntri Rangbah ka Jylla, Conrad K Sangma u la ong ba namar ba ka tnat PHE ka la mad ïa ki jingeh ha kaba ïadei bad ka jingpyntreikam ïa ka SBMGP, khamtam ba ka dei ka tnat kaba pyntreikam ïa ka Jal Jeevan Mission ka la pynlong ïa ka tnat PHE ban duna ki nongtrei kaba wanrah jingeh pat ha ka jingpyntreikam ïa ka Mission Gramin. Kumta ka Sorkar ka la shim ïa ka rai ban aiti noh ïa kane ka jingpyntreikam ïa ka SBMGP sha ka tnat C&RD.
U la ïathuh ruh ba ki don 3 tylli ki daw kaba pynlong ïa ka Sorkar ban shim ïa kane ka rai.
“Kawei ka dei ba ka tnad C&RD ka don ïa ki nongtrei ha ki shnong ki thaw ban pyntreikam ïa katei ka projek. Ka ba ar ka long namar kiba bun na ki Jylla ha ka ri ki la leh kumne da kaba aiti beit noh sha ka tnat C&RD jong ki Sorkar Jylla namar ka don ïa ki kor ki bor bad ïa ki nongtrei ban pyntreikam ïa ka SBMGP ha ka lynti kaba kloi bad kaba biang bha. Ka ba lai ka long ba ha ka jingïalang kaba dang shu dep bad ka Jal Shakti Ministry, u Myntri Sorkar, u Secretary bad ki heh ophisar ki la ai jingmut ïa ka Sorkar Meghalaya ruh ban aiti noh ïa ka SBMGP ban pyntreikam da ka C&RD”, la ong u Conrad.
