Jowai, K’lyngkot 30
Saw ngut ki kyrtong ka United Democratic Party (UDP) ha ka 30 tarik Kyllalyngkot ki la thep kyrteng na ka bynta ban ïakhun ïa ka ilekshon MDC sha Jaiñtia Hills Autonomous District Council (JHADC) ka ban long ha ka 21 tarik Rymphang.
Kine saw ngut kyrtong ka UDP ki kynthup ïa u MDC barim Ma Rioo Sten na Barato Mukroh, u Waheh Shnong ka Namdong B bad nongïalam barim ka FKJGP Bah Damian War na 10-Mynsngat Khanduli Konstitwensi, u Bah Fernando Sumer na 13-Saphai Sahsniang Konstitwensi bad Bah Rimilanki Synnah na 7-Nartiang Wahiajer Konstitwensi.
Haba kren sha ki lad pathai khubor halor ka jingpynkhreh ïa ka ilekshon, u Bah Rioo Sten u la ong kum u MDC barim uba la jop teng ha u snem 2009 haduh 2018 u la pyrshang ban wanrah shibun ki kam pynroi hapoh ka Konstitwensi, bad bynrap ba wat hapdeng ka jingshah rem noh ha u 2019 hynrei u khlem shongthait ban ai ka jingïatreilang ryngkat bad u paidbah.
Ka thong jong u ha kane ka kynti ka long ban pyndep ïa kiba bun bah ki kam pynroi bad ka shongsuk shongsaiñ hapoh ka Konstitwensi kaba don ha ka thaiñ khappud bad ka Karbi Anglong bad ban ïada ïa ki jaka puta kiba don ha ka thaiñ khappud Assam.
U Bah Damian War u la ong ba u la long uba la pynkhreh bha bad pynpaw ruh ka jingsngew skhem ban ïoh ïa ka jingjop. Ka thong ba hakhmat eh jong u, ka long ban pynsuk ïa ki paidbah khamtam ha ka thaiñ khappud ha kaba ïadei bad ki kot ki sla kynthup naduh ki kot pata ki Land holding namar kumba long mynta ka shim por 3-4 snem ban pyndep bad shongdor ruh haduh 1600 tyngka, kumta lada u wan ha ka thong un buh da ka por ban pyndep ïa kane ka bynta.
U Bah Rimilanki Synnah u la ong ka daw kaba pynlong ïa u ban ïakhun ïa kane ka ilekshon, ka long ka jingthrang ban shakri ïa u paidbah khamtam ïa kiba duk ba rangli bad lada u ïoh ka jingjop un pynskhem ïa ka jinglong trai halor ka khyndew ka shyiap bad ban pynneh ïa ka riti dustur.
Katba u Bah Fernando Sumer u la ong, ha ka jingïaid lynti jong u kum u samla u shem ka Konstitwensi ka dei kaba shah iehbeiñ ha baroh kynthup naduh ka jingbym biang ki lynti syngkieñ, ki surok, ka umbam umdih, ki jaka pule nalor kiwei kiwei ki jingeh, bad bynrap ba dei kane kaba pynlong ïa u ban rai rangbah ban ïeng ïakhun ïa kane ka ilekshon khnang ban wad ki lad ki lynti na ka bynta ban wanrah ïa ka hok ba ki paidbah ka thaiñ ki dei ban ïoh.
U la kynthoh ruh ïa ki MDC kiba la dep ban pynjop la ar ne lai snem kim don ka jingkitkhlieh na ka bynta ka roi ka par jong ka Konstitwensi.
