
Shillong, K’lyngkot 30
Ka Kynhun Myntri jong ka Sorkar MDA-II ka la ai jingmynjur ïa ka Ordinance ban pynheh ïa ka song pisa jong ka Contingency Fund ka Meghalaya sha ka T.1005 klur.
Haba pyntip ïa kane hadien ka jingïalang ha ka Sngi Palei, u Myntri Rangbah ka Jylla, Conrad K Sangma u la ong ba ka Sorkar ka la mynjur ïa ka Ordinance jong ka Contingency Fund ka Meghalaya bad ka song na ka bynta ka corpus fund la pynkiew sha ka T.1005 klur ban lah pyndap pynbiang ïa ki jingdonkam kiba mih hadien ba la dep ban mynjur ïa ka mang tyngka jong ka Jylla.
Haba pynshai halor kane ka rai, u Myntri Rangbah u la ong ba ka Contingency Fund ka dei hapoh ka rukom mang tyngka jong ka Sorkar.
“Hadien ba ka mang tyngka kaba la mynjur hapoh ka Ïingdorbar ka la lut noh na ka bynta kano-kano ka tnat, ki tnat ba dang donkam pisa shuh-shuh ki dei ban wanrah ïa ka supplementary demand khnang ban lah pynlut kham bun lada donkam bad ïa ka supplementary demand ruh dei ban mynjur da ka Ïingdorbar”, la ong u Myntri Rangbah.