Shillong, K’lyngkot 31
Ki pulit ka West Garo Hills (WGH) ki la ïoh ban kurup noh haduh 17 tylli ki ar-shaka kiba la shah tuh bad kem ruh ïa 4 ngut ki runar kiba donkti ha kane ka kam kynthup ïa u snar nonglute jong ka kynhun.
“Ha ka jingkhynra kaba bteng halor ka jingshah tuh ki thuk-thuk ha ka distrik, ki pulit ka WGH ki la ïoh ban kurup noh haduh 17 tylli ki ar-shaka ba la shah tuh bad kem ruh ïa 4 ngut ki briew kiba donkti ha kane ka kam runar ba kynthup ïa u snar nonglute ba kongsan jong ka kynhun,” ong u Superintendent of Police (SP) ka WGH, Abraham T. Sangma, IPS ha ka kyrwoh khubor.
Haba kdew ba kane ka long shi bynta jong ka jingkhynra kaba shi taïew lynter pyrshah ïa ki nongtuh thuk-thuk, u SP u la ong ba ka tnad ka la ïaid shakhmat bad ka jingkhynra hapoh ka jingïalam u CI (Sadar), West Garo Hills, Tura bad u Officer In-Charge, Tura PS ha ryngkat ka jingïatreilang bad ki paralok pulit na Assam. Kine 4 ngut kiba shah kem ki kynthup ïa u nongshah kynnoh ba hakhmat eh, Jamesmond K. Marak @ Simon (32 snem ka rta), na Balsrigittim, Raja Apal PS: Bajengdoba, North Garo Hills, lem bad 3 ngut kiwei pat ki runar – Tengwal R. Marak (28 snem ka rta) na Jamge (A), Songsak, East Garo Hills, Jangkal B. Marak (31 snem ka rta) na Rongchek Apal, Songsak, East Garo Hills, bad u Judistil T. Sangma (33 snem ka rta) na Dosikgittim, Mangsang PS, Rongjeng, East Garo Hills. Katkum ka kyrwoh na u SP, kine ki ju don bynta ha kiba kum kine ki kam runar bad ki la shah kem teng ruh mynshwa ha kiba bun ki kam shah tuh thuk-thuk.
Hynrei hadien ba ki la ïoh jamin, ki la sdang biang ïa ki kam be-aiñ jong ki.
“Ka jingtohkit ka la lap ba ïa ki thuk-thuk kiba la tuh la pynkit bad die lyngba ka rukom treikam kaba la pynbeit ryntih bha. Ki pulit ka West Garo Hills, ki trei shitom ban pynpra ïa kane ka kynhun khnang ban ïoh biang ïa ki kali ba shah tuh na ki bynta bapher-bapher jong ka distrik bad kiwei-kiwei ki Jylla,” ong u Sangma.
Haba ïadei bad kane ka jingjia, la pynngat mukotduma katkum ka kyndon BNS 2023 bad ka jingtohkit ka dang ïaid shakhmat. Na ka liang ki pulit ka West Garo Hills District, ki kyntu ïa ki paidbah ban long kiba husiar bad ban pyntip ïa kino-kino ki kam kiba ishankhmat haba ïadei bad ka jingshah tuh kali/ar-shaka sha ki thanat ba jan tam lane ban kynjoh sha ka Police Control Room, Tura – 8837423053 bad 9089199064. Shuh shuh, ki pulit ka distrik ki la kyntu ïa baroh ki trai ar-shaka ban pynïeng ïa ki thuk-thuk/scooty jong ki ha ka jaka kiba biang bad ban buh ïa ka ‘Vehicle Tracker’/’GPS System’ lane ban pyndait ïa ki ‘Steering-Lock’ lane ‘Wheel-Lock’ ha ki ar-shaka jong ki.
“Kine ki lad jingïada ym tang ba kin ai shuh ka jingshngaiñ kaba kham bha ïa ki ar-shaka, hynrei, kin khanglad ruh ïa ki runar ban pyrshang tuh ïa ki,” pynkut ka kyrwoh na une u heh pulit ka distrik.
