Shillong, K’lyngkot 31
Ka kynhun jong san tylli ki Synjuk Nongsynshar Shnong ha ka Sngi Thohdieng ka la pynpaw ka jingsngewkhia halor ka jingmih ha ki lad pathai khubor ba hap ban hukum ïa ki Dorbar Shnong (DS) ban shah ïa ki seng saiñpyrthei ban pynlong ïa ka jingïalang paidbah ban ïalap ilekshon na ka bynta ki kyrtong MDC.
Ban pynpaw ka jing-kyrshan pura ïa ka Mawlai Town Dorbar (MTD), ka kynhun na san tylli synjuk ka la don ryngkat lang bad ka Mawlai Town Dorbar. Kane ka Synjuk ki Nong -synshar Shnong ba kynthup ïa ka Synjuk ki Nongsynshar Shnong Nongthymmai Pyllun, Synjuk ki Rangbah Shnong Laitkor, Synjuk ki Rangbah Shnong Shiliang Umkhen, Syn-juk ki Rangbah Shnong Pynthorumkhrah, Synjuk ki Rangbah Shnong Upper Shillong, bad kumjuh ka Mawlai Town Dorbar (MTD) ki la shong ïa ka jingïalang ha ka janmiet Sngi Thoh-dieng ban ïakren halor ka jingshah hukum ka MTD.
U Convener ka Synjuk, Bah Bantyllilang Nari u la ong, kam don rukom ba hap ban hukum lane kyntu ïa ki dorbar shnong ban ai jingbit. Kane ka jingïakynduh jong ka Synjuk ka long hadien ba ka la ïohi ha ki lad pathai khubor ïa ka jingthoh shithi u secretary ka VPP sha u Commissioner & Secretary ka tnat DCA, ban hukum ïa ki dorbar shnong ban ailad pynlong ïa ki jingïalang paidbah.
“Kam pat ju don ka sien ban hap ai da ka hukum ïa ngi ba ngin ai jingbit ban pynlong jingïalang. Ngi tip ïa kata ka hok ba ki kyrtong ki dei ban ïoh”, u la ong.
“Ym dei tang kita kiba ieid jaidbynriew, ngi lei ngi ieid kham bha namar ngi kit ïa ka kam kaba ym don jingsiew”, la bynrap shuh shuh u Bah Nari. U Nongïalam ka Synjuk u la ong, haba mih kine kiei-kiei ka plie lad shabar ban ïoh kynthoh shuh ïa ki bor shnong.
“Lada lah ïap ki bor shnong, lada lah ïap ki dorbar shnong ka jaidbynriew ka la ïap. Nga ju ong ba ka kynroh ba khatduh ban ïada ïa ka jaidbynriew dei ki dorbar shnong. Ym don seng saiñpyrthei, ym don Sorkar kaba lah ban trei bad teh lakam ïa ka jingshah tyllep ka jaidbynriew lada phim ïatreilang bad ki dorbar shnong”, u la ong.
U la ong ruh ba lada ki nongsynshar shnong ki shah ki shah kren tat dor, sha kren kawang ktieh ka long kaei-kaei kaba sngew rem ban pyrkhat.
“Nga kyntu ïa kine ki rangbah kiba pynmih ïa kine ki kyntien ba kin ai ka jingpynshai bad phin kham kiar na kaba kynthoh namar ngi ruh ngi don kajuh ka mynsiem, ngi trei na ka bynta ka jaidbynriew”, la ong u Bah Nari.
“Lada kano-kano ka seng saiñpyrthei kan wan ha ka bor, ngi kum ki nongkitkam shnong ngin don lang ha kti ha kjat ban ïatrei ban ïakit lang, hynrei lada lah don lypa ka jingthud daw jingkdew kti, hato ngi lah mo ban kyntiew ïa ka jaidbynriew? Ka jaidbynriew kaba ngi dang don tang kumba 15-17 lak, lada ngi dang ïa pharia sah bad pynpait pynpra para ma ngi tang na ka bynta ki kam ilekshon hangno ngin buh ïa ka jaidbynriew”, la ong u Bah Nari.
