
Nongstoiñ, K’lyngkot:
Ka Hynñiewtrep Youths’ Council (HYC) Maweit Circle ka la kyntu ïa ka Sorkar Jylla bad ka tnat dei peit ba kan khmih bha ïa ka jingshna ïa ka surok Nongstoiñ-Maweit kumjuh ban peitngor bha khnang ba ki kontraktor kin pyntrei bha katkum ka work order.
U President ka HYC Maweit Circle, Bah Jeremiia Dkhar, u la ong ka seng ka kyntu ïa ki kontraktor ba kin trei bha khnang ba kin im ka kyrteng sah ka nam ba ka surok ba la sah khongreng la 50 snem tam kan da neh slem lyngba ka jingsiang rong bad ka jingtrei bha ka jong ki.
Shuh shuh ha ka kyrwoh u la ong ruh ba ka seng ka kyntu ba kin da theh kham bun ki kam pynroi ha ka thaiñ Maweit kumba ki ïoh lum ïa ka khajna da ki phew spah klur na ka dong ka thaiñ Maweit.
U Bah Jeremiia u la ong ruh ba ka seng ka kyntu ïa ka ophis ba dei peit ban mang pisa noh kloi bad ban sdang pyntrei noh ïa ka surok PMGSY na Risiang sha Riangpoit bad ka surok na Wahlyngdoh sha Shyrkon A.
Ha kajuh ka por, ka HYC ka kyntu ruh ban ai kham bun ki surok PMGSY sha ka thaiñ Maweit kum na Wahlyngdoh sha Diengsnieng, Nongsba sha Umiang, Nongpathar-Nonglyer sha Shyrkon A, Maweit sha Pyndengshallang, Mawmarin sha Langlieh bad kiwei de namar lada ïanujor sha kiwei ki thaiñ, ka thaiñ Maweit ka dang duna shaba palat ki kam pynroi.
Nalor kane, u la ong ruh ba ka seng ka kyntu ïa ka Sorkar Jylla ban pynïoh noh sa ïa ka surok na Maweit-Wahblei-Kulang shaduh Nongjri ban pynïasnoh ïa ka thaiñ West bad South West ban pynïajan ïa ka ïaid ka ïeng bad kan pynkmen shi kat dei eh ïa ki paidbah na ar tylli ki thaiñ.