New Delhi, K’lyngkot 31
Ka Sorkar NDA hapoh ka jingïalam ka BJP ka lah ban wanrah ïa ka ‘Immi-gration and Foreigners Bill’ ha kane ka Dorbar Mang Tyngka ka ban long naduh ka 31tarik Kyllalyngkot haduh ka 4 tarik Ïaïong ha ryngkat ka jingsangeh shongthait ka ban don hapdeng.
Kane ka sienjam ka long shi bynta jong ka jingthmu ban thaw ïa ka aiñ kaba kham jylliew jong ka Sorkar, da ka jingthmu ban pynkhlaiñ ïa ka aiñ saiñdur jong ka na ka bynta ban shim-khia ïa ka jingeh halor ka jingwan buhai shnong be-aiñ, khamtam haba ïadei bad ki nong Bangla -desh bad ki poiwir Rohingya lem bad kiwei-kiwei ki mat kiba ïadei bad kane ka bynta.
Kane ka ‘Bill’ ka dei kawei napdeng ki aiñ ba kongsan tam kaba la buh lypa na bynta kane ka Dorbar ban wan.
Hadien ka ‘Waqf (Amendment) Bill’, la ong ba ka Sorkar u Modi ka pynleit jingmut ha ka ban pyntikna ïa ka jingïaid beit ïaid ryntih jong ka ‘Immigration bad Foreigners Bill’. La khmih lynti ba kane ka aiñ kan wanrah ïa ki lad ki lynti kiba kham pyrkhing ban tehlakam ïa ki nongwan buhai shnong, ban pynkhlaiñ ïa ka jingpahara ha ki khappud, bad ban pynkup bor ïa ki bor synshar ban shimkhia pyrshah ïa ki nongwan buhai shnong be-aiñ.
Baroh ki la don 16 tylli ki ‘Bill’ kiba la buh hakhmat eh na ka bynta kane ka Dorbar ba kynthup ïa ka ‘Banking Laws (Amendment) Bill’, 2024 ban wanrah jingpynkylla ha ki kyndon treikam jong ki jaka kynshew pisa, ka ‘Railways (Amendment) Bill’, 2024, kaba thmu ban pynthymmai ïa ka jingtreikam jong ka lynti rel bad ka jingsynshar.
Kiwei pat ki ‘Bill’ kiba la pynrung ha ka thup ba kongsan na ka bynta ka ‘Legislative Business’ na ka bynta ka Dorbar Mang Tyngka ki kynthup ïa ka ‘Disaster Management (Amendment) Bill’, 2024 haba ïadei bad ka jingpynkhreh bad ki lad ban ïaleh pyrshah ïa ki jingjia lyngshop, ka ‘Finance Bill’ 2025, kaba long kaba kongsan ban pyntreikam ïa ki mat treikam halor ka pisa-tyngka ba la kdew ha ka Mang Tyngka ka Sorkar Pdeng, 2025 bad ka Tribhuvan Sahkari University Bill, 2025.
Ïa ka ‘Waqf (Amendment) Bill’ la buh lypa ban wanrah da kaba wad ïa ki jingpynkylla ha ka jingsynshar jong ka ‘Waqf’.
Namar ki jingeh kiba khraw ha ka liang ka jingwan buhai shnong bad ka jingshngaiñ ka ri, ka Sorkar ka paw ba ka la kut jingmut ban pynskhem ïa ka nongrim jong ka aiñ halor kine ki mat. Ka jingwanrah ïa kine ki ‘Bill’, khamtam kito kiba ïadei bad ka jingwan buhai shnong bad ki bar-ri, ka ‘Bill’ ka pyni ïa ka jingthmu ka Sorkar ban pyntreikam ïa ki jingkylla ha ka mat treikam ba kongsan shuwa ka ilekshon ha u snem 2029.
