Shillong, Naitung 19
U Bah Roy Kupar Synrem, President ka Hynñiewtrep Youths Council (HYC) u la pynpaw ka jingsngewkhia ba don ki briew kiba pyrshang ban ïalam bakla da kaba ong hana ba ka Meghalaya Residents Safety and Security Act, 2016, ka la biang pura ban tehlakam ïa ka jingwan rung kyrthep ki mynder sha ka Jylla.
Haba kren ha ka jingïalang rakhe ïa ka jingdap 12 snem kynthih jong ka seng ha Laitarted, Eastern West Khasi Hills District ha ka 17 tarik u Naitung 2026, u Bah Roy Kupar Synrem u la ong, ba ka seng ka ïohi ïa ka jingslem ka Sorkar India ban mynjur ban ai pyntreikam ïa ka Inner Line Permit (ILP) ha Meghalaya, wat hadien ba la mynjur da ka Resolution ha Iingdorbar Thawaiñ ka Jylla ha u snem 2019, bad kaba dangsah teng haduh mynta.
U la ong, ba la pynbor ban bsuh ïa ki kyndon ban tehlakam ïa ka jingwanrung ki bar jylla ha ka MRSSA 2016 bad ka Sorkar MDA ka la wanrah ïa ka Meghalaya Residents Safety and Security Amendment, 2020 bad pass ha Iingdorbar Thawaiñ.
Hynrei ka tnad Kam-Pohïing ka Sorkar India, ka la pynphai ïa ka Meghalaya Residents Safety and Security Amendment, 2020 bad ka Sorkar kam pat kren shai kumno kan leh halor kane bad da kino ki sienjam kan shim, ban tehlakam ïa ka jingwanrung kyrthep ki mynder, namar haduh mynta ym pat don aiñ ban ïada.
“Ka jingdon kiba ong, ba ka MRSSA-2016 ka la biang pura ka pynlyngngoh ïa ka HYC, namar ha kane ka aiñ ym don kyndon ban tehlakam ïa ka jingwanrung ki briew na shabar jylla,” u la ong.
U la ong ba kam long kaba ïahap ban ïalam bakla ïa ki paidbah bad ka seng ka ïeng ha ka nongrim, ba dei ban pyntreikam ïa ki kyndon kiba la wanrah ha ka Amendment 2020 ha ka MRSSA-2016.
“Ngi dawa ba ka ILP kadei ban wan ha ka Jylla. Ka jingdawa ïa ka ILP kamdei ka jingdawa tang jong ka HYC, hynrei kadei ka Resolution kaba la pass da ka Iingdorbar Thawaiñ ka Jylla, kadei ka jingdawa jong ki sengbhalang bapher-bapher bad kadei ka jingdawa jong u paidbah ka jaitbynriew hi baroh kawei,” la ong u Bah Roy Kupar.
U la buh jingkylli sha ka Sorkar Jylla, ba lada kata ka MRSSA-2016 ka la biang, to pyni ha ka kyndon aiu kaba hukum ïa u briew ba lada u wanrung sha ka Jylla, u hap ban pynrung kyrteng ïalade bad to pyni ha ka kyndon aiu kaba ong ha ka MRSSA, ba lada u briew u thmu ban shong ban sah u hap ban ai ka jingtip.
“Ha ka MRSSA-2016 kam don kaba kumta kata ban ong, ba ka la ïada na ka jingwan rung kyrthep ki briew ba nabar sha ka Jylla, ka jubab kaba shai ka long ‘ymdon’.
