Shillong, Naitung 19
Kum ka dak ka jingïashim bynta ban kynmaw burom ïa ka lyngkhuh sngi ïap ba 191 u Tirot Sing Syiem, ka Ïeng Rasong Sports Social & Cultural Club ka la pynlong ïa ka jingïalang kaba lyngkot ban pyrto ïa ki kam kiba utei u khlawait ka jaidbynriew u ïada na ka jingsynshar donbor ka Sorkar nongwei ha kito ki por.
Ha katei ka jingïalang la wan ban long kongsan u MLA ka Pynthorumkhrah u Bah AL Hek, u MDC ka Mawkhar-Pynthorumkhrah u Bah Strong P Kharjana, u MLA ka Mawryngkneng Constituency u Bah H.S Kharpran ki nongïalam ba hakhmat ka ÏRSC&CC bad kiwei.
U Bah Hek haba ai jingkren ha ka jingïalang u la pynkynmaw ïa ki kam bakhraw jong u Syiem Tirot bad kiwei kum ki jong u Woh Kiang Nongbah, ka Phan Nonglait kiba la ïaleh bad kiba la lenlade na ka bynta ka jaidbynriew.
U la pynkynmaw ruh ïa u James Joy Mohan Nichols Roy u ba la len lade ban pynïoh ïa ka District Counci, u Martin N. Majaw uba ïaleh ban pynïoh ïa ka aiñ bat khyndew (Land Transfer Act), hynrei kiba bun mynta kim tip bad kim kynmaw shuh ïa ki.
U Bah Strong haba kren u la ong ba kum ka jaidbynriew ka long ka jingsarong ba ka don kum u Syiem Tirot u ba shynrang mynsiem ban len lade ban ai ka jingshakri ïa ka Hima Nongkhlaw ha kitei ki por bad kdew ba u Syiem Tirot u long ka nongmuna ïa ka mynta ban ïada ïa ka jaidbynriew Hynñiewtrep.
