Shillong, Naitung 19
Ka Hynñiewtrep Youths’ Council (HYC) ha ka 17 tarik u Naitung, 2026, kaba dei ruh ka sngi jingdap 191 snem ka jingkhlad noh u Pa’iem Tirot Sing Syiemlieh, ka la rakhe ïa ka jingdap 12 snem ka jingïaid lynti jong ka, da ka jingïalang ha Laitarted, Hima Nongkhlaw ha Eastern West Khasi Hills District.
Ha katei ka sngi shuwa ka jingïalang, ka seng ka la plie ïa ki motdur jong u Syiem Bor Manik bad u Syiem Sngap Sing, kiba shong ha ki kulai ha syndah u motdur shi rynïeng jong u Syiem Tirot Sing Syiemlieh, ïa uba ka seng ka la plie ha u snem ba la dep.
Ïa kine ki motdur la saiñdur bad shtah da ki barikor ka Riti Academy of Visual Arts, kata u Bah Raphael Warjri, Banteilang Hynñiewta, Returnwell Sutong, Skhemlang Hynñiewta, Ialissing Mawrie, Bapynskhem Mawrie bad Batskhemlang Kharumnuid.
Ha kane ka sngi, la pynlong ruh ka jingbuh syntiew ha kjat u motdur ba shi rynïeng u Syiem Tirot Sing Syiemlieh, da ki nongïalam bad dkhot ka HYC ba kynthup ïa u Bah Roy Kupar Synrem, President, u Bah Rhembor Saiborne, General Secretary, u Bah Donboklang Kharlyngdoh, Vice President, ki Syiem bad ki Myntri na ki Hima bapher-bapher.
Ia u motdur jong u Syiem Bor Manik la plie pyrda da u Syiem Khynnah ka Hima Khyrim, u Pa’iem Habapan Sing Syiem bad ïa u motdur jong u Syiem Sngap Sing la plie pyrda da u Pa’iem Niandro Syiemïong, Syiem ka Hima Maharam.
Ha ka jingïalang ka seng ka la pynkup-burom ïa ki thei-ïalehkai phutbol ba kynthup ïa ka Sanfida Nongrum, ka Ribansi Jamu bad Ribahunshisha Kharshiing nalor ka Kong Riiohlang Dhar kaba dei ka Refree.
Nalor kane ka seng ka la pynskhem ïa ka HYC Women’s Wing na ka bynta ka samoi treikam 2026-2029 bad ka la pynkup-burom bad ai khusnam sha ki samla kiba la pass bha ha ki eksam jong ki.
Haba kren ha ka jingïalang, u Bah Roy Kupar u la ong ba ka seng ka la ïaid lynti ha ki 12 snem ha pdeng ki jingshah kynthoh, hynrei ka seng kan nym sngap satia bad kan ïaid sha khmat ban kren pyrshah ïa ki mat kiba ktah matïong ïa ka jaitbynriew Hynñiewtrep.
Nalor kiwei-kiwei ki mat, u Bah Roy u la pynpaw ba kam myntoi ban pynkut jingdawa ïa ki mat tang ha surok lane ban pynpaw pyrshah bam sap.
U la ong ba ka por ka ïa, ka la donkam ba ki khun samla ba stad bad shemphang, ba kin don ha ka seng ban khyllie ïa ki kam kiba ym ïahap namar kum ka bamsap ka rieh ha ki file, ki tender agreement, ki kyndon bad ha kiwei-kiwei pat ki bynta.
Ha ka jingïaid lynti jong ka seng u Bah Roy Kupar u ong “Ngim don pisa, ngim don bor bad ngim don ïa ki heh ki haiñ ki ban pynsuk ïa ka lynti ïaid jong ngi, tad haduh u ne u mawmer uba 12”. U la bynrap ba ngi don tang kawei bad kata kadei ‘Ka jingngeit’, ba ka jingngeit ba ki Samla kidei ban don ka sur bad ka jingngeit ba ka jaitbynriew kam dei ban shu sngapjar, ba lada don kano kano kla jingbym hok, dei ban don ki ban ïeng ban kren ïakata.
U la kdew ruh ba don bun ki briew kiba la kynthoh ba ka HYC kan sa pra, kan sa jah, kan sa ïa shrut bad kan sa thait hynrei ngi ong ’em’ bad ka seng kan sa nangdurut bad kan sa nangpyn tyllun nangne shakhmat ïa ki kam jong ka seng.
U la kren pynkut da kaba ong “La kha ïa ka HYC ban ïakhun kumta ngin dangïakhun nangne shakhmat ruh”.
