Shillong, Naitung 19
Baroh ki skul bad kolej ha Meghalaya kin khang khyrdep lut ha ka Lah Sngi U Blei naba ka Sorkar Jylla ka la ai shuti shisngi ban ailad ïa ki khynnah skul ban peit ïa ka phainal jong ka ‘FIFA World Cup 2026’.
U Myntri Rangbah ka Jylla, u Conrad K. Sangma u la pynbna ïa kane ha ka Sngi U Blei, da kaba ong ba kane dei na ka bynta ki samla kiba ieid phutbol jong ka Jylla.
“Ka phutbol ka dei ka jingsngewtynnad bad ka rukom im ha ka Jylla jong ngi,” la ong u Sangma.
“Hadien ba ka Spain bad ka Argentina ki la rung sha ka phainal jong ka ‘FIFA World Cup 2026’, bad haba ïohi ïa ka jingkyrshan kaba radbah kaba ngi la ïoh pdiang na ka bynta ka ‘CM Fan Park’, nga la rai ba lashai ka sngi, ka Lah Sngi U Blei, kan dei ka sngi shuti na ka bynta baroh ki shlem pule kynthup ïa ki skul bad ki kolej,” ong u Sangma.
U Myntri Rangbah u la ong ruh ba ïa kane ka rai la shim khnang ban ai lad ïa ki khun samla ba ki lah ban “sngewtynnad bad lehkmen shisha” ïa ka phainal.
“To lehkmen bad leh sngewbha ïa ka phainal bad nga kitbok-kitrwiang ïa phi baroh,” u la bynrap.
Ki ‘CM Fan Park’ ba la pynïeng da ka Sorkar Jylla naka bynta ka lympung ki la sakhi ïa ka jingïashim bynta ba radbah ha kylleng ka Meghalaya. Ka Spain bad ka Argentina kin ïakhun ïa ka phainal jong ka ‘World Cup’ ha ka Lah Sngi U Blei.
