Shillong, Naitung 19
Ka Federation of Ri-War Mihngi Local Dorbars ha ka 18 tarik u Naitung 2026 ka la ïamir jingmut halor ka long ka man ha ka leit ka wan na ka surok Laitlyngkot sha ka thaiñ baroh kawei khamtam hadien ba jan kot shi bnai ba khlem pat leh eiei ïa ka bynta surok kaba dkut na ka jingbam ka um ha u bnai ba la dep.
Ka Federation ka la pynpaw ba ka long kaei-kaei kaba sngewkhia ba ki bor ba dei peit kim pyni ïa ki sienjam ban maramot ïa katei ka surok kaba la dkut bad bynrap ba ka surok ba shipor na jaka u Bah Khrikshon Lyngkhoi ruh donkam ban pynbha ban nym buh jingeh ha ka leit ka wan katba dang shna ïa ka surok kaba dkut.
U Bah Wonderful Nongrum, Myntri ka Hima Khyrim, u la ong ba ka daw ka jingdkut ka surok ym dei ban kynnoh ïa ka Mariang, hynrei ka dei hi na ka jingpynbthei ïa ki bom pynpra maw lane ‘Blasting’ kaba la pynsynjor ïa katei ka bynta bad ka um haba ka ïohlad ka ksam bad pyntwa ïa ka surok.
Shuh-shuh u la ong ba ka dei ka jingtrei torti ka kompeni kaba la pynlong ïa ka surok ban dkut namar ym don jingshimkhia ban ïada ïa ka um.
Na ka liang u Bah Joy James Roy Khongmawloh, President ka Federation u la ong ba ki sngewtynnad ba ka KSU bad FKJGP ki angnud ban wanrah ïa ka bha ka miat ha ka thaiñ, hynrei kim pat nang ong eiei ban kyrshan lane ban kyntait ïa ka jingthmu leit shna surok ki ar seng ha ka 23 tarik u Naitung, 2026.
U la ong ba kum ka Federation kam pat ïoh jingtip bad kin hap da ïa khmih la ka jaka ba ki mut shna surok ka dei jong ki riew-shimet ne jong ka Sorkar.
U Bah Jelius Majaw, Sirdar ka Raid Mawkhap, Hima Khyrim u la pynpaw ba ka jingbym shim sienjam ki bor ba dei peit ban shna ïa ka surok ba la dkut ka pynlynga ïa ki nongshong shnong kiba hap ban mad jingeh ha ka leit ka wan, ka kit ka bah ba man ka sngi.
