
Shillong, K’lyngkot 31
U Nongïalam ka Congress ba dei ruh u Chief Whip ka Liang Pyrshah hapoh ka ïingdorbar thaw aiñ ka Jylla, Bah Ronnie V Lyngdoh u la ong ba ki paidbah ka Ri Khasi-Jaiñtia ki dei ban kyntait ïa ka Voice of the People Party (VPP), namar ka la dawa ban pyntreikam ïa ka Article 371 hapoh ka Jylla Meghalaya lada ka shah jied ban wan ha ka bor.
Haba kren bad ki lad pathai khubor ha ka Sngi Thohdieng, u MLA ka Congress na Mylliem u la ong ba u President jong ka VPP u la kren shai ba lada ka VPP ka wan ha ka bor, kin sa dawa ban pyntreikam ïa ka Article 371.
“Ngam lah ban sngewthuh, lah long kum uto u briew uba ong nga kwah ïa katei ka ïing, tangba ynda la ïoh ngan thang noh. Nga sngew kaba mynsaw, nga kyrpad ïa ki paidbah jong ka Ri Khasi ba kim dei ban biej ïa kum kine ki seng”, u la ong.
U Bah Ronnie u la ong ba dei ka seng Congress kaba la ai ïa ka Khyrnit ba Hynriew ha Meghalaya.
“Haduh mynta, ka khyndew ka shyiap, ka riti ka dustur bad ka khaïi ka pateng ki dei kiba la ïada namar ka jingïohi jngai jong ki nongïalam ka Congress lyngba ka Khyrnit ba Hynriew”, u la ong.
U Bah Ronnie u la ong ruh ba lada ka Article 371 ka kham khlaiñ bor ban ïa ka Khyrnit ba Hynriew, balei pat ba ka Ladakh ka dawa ban pyntreikam ïa ka Khyrnit ba Hynriew hapoh u pud u sam jong ka? Namar ka dei ka jingshisha ba ka Article 371 kan ym ïada ïa ka khaïi ka pateng jong ki paid riewlum, bad ka Khyrnit ba Hynriew ka kham khlaiñ bor haba phai sha ka jingïada ïa ki riewlum trai muluk, ka khaïi ka pateng, ka khyndew bad kiwei-kiwei.
Na ka liang u Nongïalam ka Congress u la kyntu ïa ki paidbah ban kyrshan pura ïa ka seng khnang ba yn lah ban pynkhlaiñ shuh shuh ïa ka Khyrnit ba Hynriew.
Haba kylli halor ka jingleit ïalap ilekshon ka VPP da ka niam, u Bah Ronnie u la ther tyngeh da kaba ong, ba ka VPP kam ïapher na ki buit ka BJP ban shim kabu ïa ka jingngeit niam jong ki paidbah.
“Kaei ka jingïapher hapdeng ka BJP bad ka VPP? Baroh ar ki shim kabu ïa ka jingsngew niam jong ki paidbah. Lada ngi kynnoh ïa ka BJP ba ka shim kabu ïa ka jingsngew niam, ka VPP ruh hap kynnoh ba ka leh lang kumjuh”, u la ong. Ha kaba ïadei bad ka jingkam ieid jaidbynriew, u Nongïalam ka Congress u la ong, “Nga lah ban ong ba nga ieid jaidbynriew katba ka kam jong nga pat mar khongpong,” u la ong.
“Mynta phi kwah ban pynduh noh ïa ka Khyrnit ba Hynriew. Lada wan ka Article 371, ki Dorbar Shnong kin sa duh noh. Kumno phi kam ba phi ieid jaidbynriew, ka Sixth Schedule ka la ai jingïada ïa ngi kumta balei ba ngin pynduh noh ïa ka”, la bynrap shuh shuh u Nongïalam ka Congress.
Ha kajuh ka por u Nongïalam ka Congress u la kynthoh tyngeh ruh ïa ka kyrtong MDC jong ka Voice of the People Party (VPP) na Mylliem, Kong Aibandaplin Lyngdoh Nonglait, da kaba ong ba ka la ïalam bakla ïa ki paidbah da kaba kam ba ka pule Theology haba ka pass tang ka klas XII.
“Haduh katta i lah ban shim kabu halor ka jingsngew niam jong ki briew. Ha ka affidavit ba i leh ha ka por ba ïaleh ïa ka MLA ilekshon i dang pass tang klas XII, ym don hangno-hangno kaba pyni ba i la pule Theology”, la ong u Bah Ronnie.
U la ong shuh shuh ba lada ka kyrtong kaba ïakhun ïa ka ilekshon ka la nud ban thok ïa ki paidbah tang ban jop, ym tip shuh lada la ïoh ïa ka jingjop kan leh aïu.