Phah jingthoh ka JAC sha u CEM ba ïoh jingtip ba don ka jingdie ïa ka jaka ha Umshalani

Kane ka jingdie ïa ka jaka kumba 10 hajar akar tam ka long pyrshah ïa ka Ceiling ba la buh da ka KHADC."

Shillong, K’lyngkot:

Hadien ba ka Joint Action Committee (JAC) ki khun ki hajar ka Hima Sohïong ka la ïoh jingtip ba u Syiem ka Hima Jirang u la die ïa ka jaka ha ka shnong Umshalani kumba 10 hajar akar hapoh ka shnat Hima Nongwah Mawtamur, Hima Sohïong sha uwei u briew, ka la pynlong ïa ka JAC ban phah da ka jingthoh sha u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem halor ka jingkyrpad ban thung da ka jingtohkit halor kane ka bynta.

Ha ka dorkhas ba la soi da u Chairman ka JAC, Bah Purningstar Shabong bad u Secretary Bah March Kupar Thabah ki la ong, “Na ka liang jong ka Joint Action Committee ki khun ki hajar ka Hima Sohïong ngi dap da ka jingsngew kyndit ban ïoh jingtip ba ka don ka jingdie duh jong u Syiem Jirang sha uwei u briew ïa kawei ka jaka kaba don ha ka shnong Umshalani kaba hap hapoh ka shnat Hima Nongwah Mawtamur kaba heh 10 hajar akar. Kane ka jingdie ïa ka jaka kumba 10 hajar akar tam ka long pyrshah ïa ka Ceiling ba la buh da ka KHADC.”

“Kane ka jingdie jaka ka dei hadien ba ka KHADC ka la pynphai biang ïa kane ka shnat Hima sha ka Hima Sohïong, hynrei ïa ka kot dulir die jaka la shu ai tarik shadien (back-date),” la ong ka dorkhas na ka JAC.

“Ngim lah ban shu pynshisha la kane ka long ne em kaba shisha hynrei lada ka dei kaba shisha ngi kyrpad ba phin sngewbha ban pynsangeh ïa kane ka jingdie jaka namar ba kane ka jaka ka hap hapoh ka shnat Hima Nongwah Mawtamur, Hima Sohïong,” la bynrap ka dorkhas.