Pyndep sa 5 ngut ki kyrtong ïa ka jingthep kyrteng ha WKH

Ïa u kyrtong ka Congress, Bah Bormanding pat la synran lang ruh da ki nongkitkam jong ka Congress kynthup ïa u Bah J.T.S.Thongni, MDC barim.

Nongstoiñ, K’lyngkot 31

San ngut ki kyrtong ki ban ïakhun ha kane ka ilekshon MDC na lai tylli ki konstitwensi hapoh ka West Khasi Hills ha ka Sngi Thohdieng ki la leit ban pyndep ïa ka jingthep kyrteng ha khmat ki Returning Officer.

Kitei san ngut ki kynthup ïa lai ngut ki kyrtong ka HSPDP – Kong Badariti Lyngdoh Nonglait kyrtong na Nongstoiñ, Bah Sraly Rashir kyrtong na Mawshynrut, Bah K.P.Pangniang kyrtong na Rambrai Jyrngam, kumjuh u Bah Bormanding Nonglang, kyrtong ka Congress na Rambrai Jyrngam, bad u Bah Gardinal Sohshang kyrtong ka NPP na Mawshynrut.

Ha kane ka sngi ïa kine lai ngut ki kyrtong ka HSPDP la synran lang da kiba bun ngut ki paidbah, u Bah Methodius Dkhar, MLA na ka Mawshynrut bad kiwei-kiwei.

Ïa u kyrtong ka Congress, Bah Bormanding pat la synran lang ruh da ki nongkitkam jong ka Congress kynthup ïa u Bah J.T.S.Thongni, MDC barim.

Nangta, ïa u kyrtong ka NPP na Mawshynrut la synran lang da ki nongkitkam ka NPP ba kynthup ïa u Bah Macmillan Byrsat MLA barim, ha kajuh ka por  kum u District President ka NPP, u MLA ka Nongstoiñ, Bah Gabriel Wahlang bad u Bah Gigur Myrthong MDC ka Mawshynrut, ki nongkyrshan bad kiwei-kiwei.

Ka Kong Badariti Lyngdoh Nonglait, kyrtong MDC na Nongstoiñ haba kren sha ki lad pathai khubor hadien ba la dep ban thep kyrteng ka la ong ba ka dang don tang kawei ka aiñ ba kyrpang ba ka jaidbynriew ka dang bat skhem haduh mynta bad kata ka dei ka ai jait kmie bad ka donkam da ki aiñ kiba thikna ban ym don ba wan mushlia ïa kane ka riti ka dustur jong u khun Khasi-Khara ba la buh beit buh ryntih da u longshuwa-manshuwa.

Ka Kong Badariti ka la ong ruh ba “Lada ngi ïalehkai ïa kane, kin khyllem ki Dorbar Kur bad kin ïeng ki Dorbar Kha bad hangta kan kiew ka sang ka ma, da kaba bynrap ba ka kam ai jait kam dei ka kam shimet hynrei ka District Council ka don ïa ki aiñ ban pynneh-pynsah ïa ka.

Halor ka jingshah kynthoh ba ka dei ka nongwei, ka la ong “Ha Nongstoiñ konstitwensi, nga lah ban long ka nongwei hynrei ha kaba ïadei bad ka jingeh bad ka jingshah khñoit jong ka jaidbynriew na kadiang bad na sha kamon, ngam long nongwei shuh bad ki ishu kiba ngi dei ban rah hapoh District Council ruh kim dei ki ishu nongwei ïa nga.”

Shuh shuh ka la ong ba ka jingwan ïakhun jong ka na Nongstoiñ ka dei ba ki rangbah na Nongstoiñ ki la wan ban pynsngew ha ka ba ha kane ka kynti kaba mynta ym don shuh kiba treh ban ïaleh na ka HSPDP.

U  Bah K.P. Pangniang, MDC barim ka Rambrai-Jyrngam, uba dei ruh u kyrtong ban ïakhun biang mynta u la ong ba ka ‘6th Schedule’ kaba dei ka stieh ïada ïa ka ri bad ka jaidbynriew ka la shah khate bor lyngba ka paragraph 12 A.

“Ka seng jong ngi ka la phah ïa ki jingthoh sha ka Sorkar India na ka snem sha ka snem ban wanrah jingkylla ïa ka ‘6th Schedule’, ban pynbeit ïa ka para 12 ba ka la kdew shai ba ïa ka bor jong ka District Council kam don shuh ha ka Jylla jong ngi hynrei ka la don ha ka President, kumta ngi dawa ban wanrah jingpynkylla da kaba weng noh ïa ka kyrteng President hangto ka para 12 A B bad bsuh ïa ka kyntien Governor khnang ba ka khyndew ka shyiap bad ki jingdon-jingem ka spah mariang kan long ha ka bor jong ka District Council,” ong u Bah Pangniang.

Shuh shuh u la ong ruh ba lada u jop ne ka rem u bat ïa ka nongrim ban ïai neh ban shakri ïa u paidbah bad u don ka jingangnud, u don ka jingkitram, u don ruh ka jingbahkhlieh ba ïa ki bynta ba u la trei mynshuwa u ïohi ba ki la neh hajuh na kata ka daw u ïeng biang khnang ba un ïoh pyndep ïa ki kam jong ka konstitwensi.