
Shillong, K’lyngkot 31
Ka Sorkar Jylla kaba la kyrpad ïa ki Rangbah Shnong bad ki Dorbar Shnong ban ai jingbit ïa ki seng saiñ pyrthei bad ki kyrtong ba kin pynlong ïa ka jingïalang ïalap ilekshon, ka la shah ruh ïa ki Rangbah Shnong bad ki Dorbar Shnong kiba la dep ai jingbit lypa ban pynlong da ka ‘Common Platform’ ba kin leh kumta na ka bynta ka jingïalap ilekshon jong seng saiñ pyrthei bad ki kyrtong shimet.
Haba pynmih ïa ka jingpynbna ha ka Sngi Thohdieng lyngba ka Deputy Secretary ka Sorkar Jylla kaba peit ïa ka tnat District Council Affairs, la ong ba kane ka dei kaba bynrap lang ïa ka jingpynbna kaba la pynmih ha ka Sngi Palei (30 tarik Kyllalyngkot) halor ka jingai jingbit ban pynlong ïa ki jingïalang ïalap ilekshon, ha kaba la bthah ïa ki Deputy Commissioner ban kyrpad ïa ki Rangbah Shnong/Dorbar Shnong ban ai jingbit ïa baroh ki seng saiñ pyrthei bad ki kyrtong shimet.
Kumta, la pynshai ruh ba kito ki Rangbah Shnong/Dorbar Shnong kiba la rai ban ai jingbit ban pynlong tang da ka ‘Common Platform’ ki lah ban leh kumta na ka bynta ki seng saiñ pyrthei bad ki kyrtong shimet ha kaba ïadei bad ka jingïalap ilekshon.
Kum ban pynkynmaw, ka VPP ka la kynnoh ba ki Dorbar Shnong ki thmu ban khang ïalap ilekshon jong ka hadien ba ka Mawlai Town Dorbar (MTD) ka la ïa mynjur lang bad ki kyrtong na Mawlai konstitwensi ba ka jingïalap ilekshon kan dei da kaba ïalap ne ai jingkren lang ha kawei ka rynsan (common platform) kaba la pynbeit da ki Dorbar Shnong.
Ïa kane ka rai jong ka MTD ha ryngkat ki kyrtong ka la pynshong nongrim halor ka jingpynsngew jong ki kmie ki kpa namar ba ki samla pule ki dang don hapdeng ki eksamin bapher-bapher kiba pynlong da ka Meghalaya Board of School Education (MBoSE) namar kane ka sien kaba mynta ka jingïalap ilekshon ka ïatyngkhuh bad ka jingpynlong eksamin.