
Shillong, K’lyngkot:
U Myntri Sorkar Pdeng, George Kurian ha ka Lah Sngi U Blei u la pynbna ïa ka kyrteng jong u Rikman G. Momin kum u President ka Bharatiya Janata Party (BJP) hapoh ka Jylla na bynta ka samoi treikam kaba lai snem ha ka jingïalang kaba la long ha shlem treikam ka seng.
Ha kane ka sngi, u Myntri u la pynbna ruh ïa ka kyrteng jong u Bah A.L. Hek (MLA), Bah Sanbor Shullai (MLA), bad Bah Ernest Mawrie kum ki dkhot ka National Council jong ka seng.
“Ka sngi ka la sdang biang, ha kane ka shi snem ba la dep, ngi la ïatreilang, ki lah ban don napdeng ki dkhot jong ngi ki bym hun ne kiba nga la pynmong ïa ki…nga panmap na ki,” ong u President haba ai jingkren ha ka jingïalang.
Ha kajuh ka por, u la khot la wer ïa baroh ban ïatreilang bad minot thop na bynta ka seng naba ka BJP kam dei tang na bynta u President ne ki dkhot nongkitkam, hynrei jong baroh lang.
“Lada phi khlem shah jied na bynta kano-kano ka kam ruh, sngewbha wan shakhmat bad ïarap ban kyntiew ïa ka Jylla na bynta ka lawei baphyrnai. Kumba la ong u R.O hashuwa, shisien ka sngi ngin sa synshar ïa ka Jylla khlem ka bamsap,” ong u Momin.
U la ong ruh ba shen ka seng kan sa sdang ban pyntyllun ïa ki kam ki jam, kumta la khmih lynti ba baroh kin ïasnoh kti lang ban kyntiew ïa ka seng kum ka seng lajong.
Na ka liang u National Secretary bad National Spokesperson ka BJP, uba khmih ruh ïa ka Jylla, u Anil Antony haba ai jingkren u la ai khublei ïa ka kynhun ka BJP hapoh ka Jylla na bynta ka jingtrei shitom jong ka.
“Mynta wat la phi don 2 ngut ki MLA, hynrei 6-7 snem mynshuwa hapoh N.E., ym don kawei ruh ka Jylla kaba la synshar da ka NDA, mynta 7 na ki 8 tylli ki Jylla hapoh ka thaiñ, la synshar da ka NDA, 4 da ka BJP kaba la ïoh ïa ka jingbun paid, bad 3 kum shi bynta jong ka jingïateh lok bad ka Sorkar kynthup ha kane ka Jylla,” u la ong.
Haba ban jur halor ka jingpynleit jingmut jong u Myntri Rangbahduh ka ri, u Narendra Modi ïa ka Thaiñ Shatei Lam Mihngi, u Antony u la ong ba hapoh jong ka ‘Act East Policy’, la pynlut kumba T.6 lak klur hapoh ka thaiñ ha kine shiphew snem ba la dep ban kyntiew ïa ki lad pynïasoh kumjuh ban pynbha ïa ki jingtei, ka khaïi-pateng nalor kiwei-kiwei.
“Kane ka thaiñ ka la kiew sted bha ban ïa kiwei-kiwei ki bynta jong ka ri. Baroh kine ki la urlong namar ka jingïohi jngai bad hapoh ka jinglong nongïalam jong u Myntri Rangbahduh jong ngi,” u la ong.
Haba pynsngew ba ka seng kan ïakhun ïa ka ilekshon ban wan sha ka KHADC bad JHADC, une u nongïalam u la ong ba ha kine ki snem ban wan, ka seng ka kyrmen skhem ba kan sa ïoh shuh ki MLA bad kan sa poi ka por ba wat ha Jylla (Meghalaya) ruh, ka BJP kan sa long ka seng saiñ pyrthei kaba heh paid tam.
Shuh shuh u la bynrap, “Nga kyrpad kumta ïa ka jingïashim bynta bad jingïatreilang jong phi. Nga ai khublei biang ïa u Momin uba la shah jied biang kum u President bad nga kyrmen skhem ba hapoh ka jingïalam jong u ha kine lai snem ban wan, ka seng kan sa nangkiew bad shisien ka sngi ngin sa poi sha ka thong ban long ka seng kaba heh paid tam hapoh ka Jylla.”