Dei ba hiar arsut ka JHADC ha ka synshar-khadar ba nga mih madan biang: Moonlight

U Bah Pariat u la wan thep kyrteng hak a 31 tarik Kyllalyngkot ha DC ophis Jowai na bynta ban ïakhun ïa ka ilekshon na Jowai South Constituency kum u kyrtong shimet.

Jowai, Rymphang 02

Ka jinghiar arsut jong ka Jaiñtia Hills Autonomous District Council (JHADC) ha ka liang ka synshar khadar bad ka jingdkoh ka rukom treikam ka la pynbor ïa nga ban mih madan biang mynta ka kynti, ong u Chief Executive Member (CEM) barim jong ka JHADC u Bah Moonlight Pariat.

U Bah Pariat u la wan thep kyrteng hak a 31 tarik Kyllalyngkot ha DC ophis Jowai na bynta ban ïakhun ïa ka ilekshon na Jowai South Constituency kum u kyrtong shimet.

Haba kren sha ki lad pathai khubor hadien ka jingthep kyrteng, u Bah Pariat u la ong la 6 snem kata naduh u 2019 haduh 2025, ki nongtrei jong ka JHADC ki ïakynduh jingeh bad kim ïoh tulop la 11 bnai kynthih.

U Bah Pariat ula pynpaw ruh ka jingbynñiaw ba ïoh lehse na ka jingtlot ka rukom treikam jong ka konsil, kan poi ka por ba u Lat ka Jylla ne ka Sorkar Kmie kin shimti ban pynïaid ïa ka konsil bad ha kata ka por ka ‘6th Schedule’ kan duh kan dam noh bad wanrah ka jingduh kaba khraw halor ka hok longtrai halor ka khyndew ka shyiap, ka dustur ka riti bad kiwei-kiwei ki hok longtrai.

Lada ki paidbah ki ibit ïa u ha kane ka kynti, u Bah Pariat u kular ban pynkhie im biang ïa ka konsil kumba ka long mynshwa bad un thaw ïa ki lad ki lynti kumno ban pynmih ïa ka khajna bad kiwei-kiwei ki lad ban kyrshan ïa ka konsil.