
Shillong, Rymphang 02
Ka ilekshon ban jied ïa ki nongmihkhmat sha ka ïingdorbar thawaiñ jong ka Khasi Hills Autonomous District Council (KHADC) ka ban long ha ka 21 tarik mynta u bnai, kan long kaba itynnad ha kaba ki nongmihkhmat kin ïatynjuh bor para maki, kata ban sakhi ka jingïakhun hapdeng ki MLA pyrshah ïa ki MDC.
Ki don ar tylli ki konstitwensi ha kaba u MLA bad u MDC, ki la mih shakhmat ban ïakhun pyrshah bad yn sa lah ban tip mano ba khlaiñ bad ïano ki paidbah ki kwah tad haduh ka 24 tarik mynta u bnai, kaba dei ka sngi ban ñiew ïa ki vote.
Haba phai sha kane ka bynta, lah ban sakhi ba ha Jirang Konstitwensi, u MLA ba mynta u Bah Sosthenes Sohtun jong ka NPP un ïakhun pyrshah ïa u MDC ba mynta u Bah Victor Ranee uba dei u kyrtong ka Congress. Lah ban pynkynmaw ba u Bah Victor dang shen u la mih noh na ka NPP hadien ba u la sngewthuh ba un nym ïoh tiket shuh.
Kumta ha kane ka kynti kaba mynta, ka jingïakhun kan long kaba itynnad bha ha Jirang, hato ki paidbah kin dang jied ïa uwei na kine ne, kin jied noh da uwei pat uba thymmai bad ïa kane yn sa lah ban tip tad haduh ka sngi ba pynbna ïa ka risol.
Kumjuh, ha Mawphlang-Diengïei konstitwensi, yn ïoh ban sakhi ïa ka jingïakhun hapdeng u MLA pyrshah ïa u MDC, kata u Bah Beyondstar Kurbah, MLA ba mynta bad kyrtong ka UDP un ïakhun pyrshah ïa u MDC ba mynta u Bah Lamphrang Blah, uba dei u kyrtong ka NPP.
Katba ha kiwei pat ki konstitwensi ba la mih hi da u MLA ban ïakhun, kan dei ha Sohïong Konstitwensi ha kaba u Bah Synshar Lyngdoh Thabah, u la mih shakhmat ban ïakhun ïa ka ilekshon MDC kum u kyrtong ka UDP bad ruh ha Ranikor Konstitwensi, u Bah Pius Marweiñ uba dei u MLA ba mynta, u la mih hi shakhmat ban ïakhun ïa ka ilekshon MDC na ka UDP.