Ha ka Proseshon Iukharist la plie ïa ka Jubili Ksiar ka Seng Samla

Da ki hajar ngut ki paid U Blei ki la shim bynta riewblei ha Proseshon Iukharist ha ki jingduwai bad jingrwai.

Shillong Rymphang 02

Ka St. Petrus & Paulus, Parish Pynthorumkhrah, Shillong ha ka Sngi U Blei ka la pynlong ïa ka Proseshon Iukharist bad ha ka kajuh ka por ka la plie ruh ïa ka Jubili Ksiar jong ka Seng Samla.

Da ki hajar ngut ki paid U Blei ki la shim bynta riewblei ha Proseshon Iukharist ha ki jingduwai bad jingrwai.

Ha ka por mynstep la sdang da ka Mass Bakhuid ba la pynbynta da u Sohblei Francis Kharpan ha jingsynranlang u Sohblei Laurence Nongkseh u Nongsharai Rangbah ka Parish Pynthorumkhrah, u Sohblei Alister Marweiñ u Lyngdoh synrop, u Sohblei Teles Nonglang Nongsharai ka Parish Mawlai bad kiwei kiwei.

U Lyngdoh Sohblei Francis haba ai jingkren u ïathuh hadien 40 Sngi ka jingkha ia u khunlung Jisu ha kane ka sngi ka Balang ka rakhe ïa ka jingaiti ïa u khunlung Jisu ha ka Temple da ki kmie ki kpa jong u bad ynda la poi ha Temple u Simeon tang shu ïoh kdup ïa u khunlung Jisu u la dap da ka jingkmen bad u la duwai.

Ka Parish Pynthorumkhrah ka dei shnat Niam kaba la biang la bit ha ki kam mynsiem bad kiba khlaiñ ha jingïatrei lang jong ki paid U Blei ryngkat ka Parish Pastoral Council.

Ïa ka Proseshon Iukharist la sdang na phyllaw jong ka ïingmane bad la ïaid tawiar ïa ka shnong Lumshyiap sha Pynthorbah bad la pynkut biang ha phyllaw ïingmane da ka jingmane ïa ka Sacrament Bakhuid Tam ka Duwan ba la ïalam da u Sohblei Laurence Nongkseh. Hadien ka Proseshon Iukharist ka Seng Samla Parish ka la plie ïa ka lynti jubilee ba 50 snem jong ka naduh ba la seng ha u snem 1975 da u Sohblei Laurence Nongkseh bad la pynbud pat da ka jingkren na u President ka Seng Samla u samla Kit Royney bad ka jingrwai ïa ka Anthem jong ka seng samla.