Haba ieid jaidbynriew leh da ka kam ym ban heh tang ka nia: Hamlet

Kane ka jingkren u Bah Dohling ka long halor ka jingdon ka seng kaba leit ban ïalap ilekshon ha ka kyrteng ieid jaidbynriew.

Shillong, Rymphang 02

U Working President ka National People’s Party (NPP), Bah Hamlet Dohling u la ong haba ieid jaidbynriew leh da ka kam ym ban heh tang ka nia. U la ong ba ka NPP ka ngeit ba haba ieid jaidbynriew kaba kongsan ka dei ka kam ban pyni sha ki paidbah.

Kane ka jingkren u Bah Dohling ka long halor ka jingdon ka seng kaba leit ban ïalap ilekshon ha ka kyrteng ieid jaidbynriew.

“Ki paidbah baroh hi la ha sor lane nongkyndong ki ieid ïa ka jaidbynriew, u bym ieid ïa ka jaidbynriew u la dei satang uta u ingkhong shyllangmat. Ngam ngeit ba ka jingkam uwei ar ngut kan long kaba dei”, la ong u Bah Dohling haba kren bad ki lad pathai khubor ha ka Sngi Thohdieng.

U la ong ba ai ki paidbah hi kin bishar mano ba ieid jaidbynriew, namar ka ktien lah ban kren ban hylla shane-shatai hynrei, hato kita ki ktien ki long kam ne kim long? “Ngi haba ngi ong ba ngi ieid jaidbynriew ngi leh da ka kam ngim heh tang ka nia, ka NPP ka ngeit ba ha ka jingshakri paidbah kaba kongsan ka dei ka kam ban pyni sha ki paidbah”, la ong u Nongïalam ka NPP.

Halor ka jingshah kynnoh ka Sorkar ba ïalam da ka NPP ba ka dei kaba bamsap, na ka liang u Bah Dohling u la ong ban shu kynnoh ka long kaba suk, hynrei ha ka jingshisha dei ban kdew ban paw khnang ba ki paidbah ruh kin tip mano uta.

“Ban shu ong bamsap tang na ka daw ban jop ilekshon mano-re-mano ka long kaei-kaei ka bym lah ban pdiang. Ngi kum ka seng ngi ngeit ha kita namar ngi kwah ban ai ka jingsynshar kaba khuid ka ban pynhun ïa u paidbah, la ka long ha ka Sorkar lane ha district council”, u la ong.

U la ong shuh shuh, “Kumba la ong da u Bah HS Shylla, kine ki jong u Bah Ardent kiba ong ba ym donkam shuh ïa ki district council bad dei ban wanrah noh da ka Article 371, kine hi kiba ïakhun ïa ka ilekshon MDC. Kaei ka jingmut? Ka dei tang ka nia ban shu pynbiej ïa ki paidbah”.

U la ong ba ki paidbah mynta ki la stad bad ki tip ruh kaei ka district council, bad bynrap ba ka NPP lada ka jop kan pynkhlaiñ ïa ka district council namar ka dei ka stieh bah ka ban ïada ïa ka khyndew ka shyiap ka riti ka dustur bad kumjuh ïa ka long kur long kha.

U Bah Dohling u la leit ban synran ïa ki kyrtong kiba la leit ban thep kyrteng ban ïakhun ïa ka ilekshon MDC.

Haba kylli, u la ong ba ka NPP ka don jingkyrmen ban jop bun tam ki MDC bad kan thaw ïa ka executive committee ha KHADC.