Jowai, Rymphang 02
Ka Fishing Association Mukhla Dorbar Pyllun ka la pyntip ba ka don ka jingïap jong ki dohkha hadien ba ki runar ki la ber da ki dawai bih kaba la ktah ïa ka jinglong jingman ka wah bad ki dohum dohpnat.
Ka Synjuk ka la pyntip ba kane ka la jia ha ka 30 tarik Kyllalyngkot, ha kaba ki runar ki la ber ïa ki dawai bih kaba la wanrah ka jingïap ki dohkha ha ka wah Bampyrthap, Mukhla. Kine ki jingjia ki la jia na ka por sha ka por khamtam ha ka por tlang ba duna um ki wah.
U General Secretary jong ka Mukhla Dorbar Pyllun Fishing Association u Ma Charles Sumer u la ong, kane ka jingjia ka la wanrah ka jingsngewsih ïa ka synjuk kaba shimkhia ban ïada ïa ki dohum-dohpnat, kumta ka la maham jur ïa ki runar kiba pynsniew ïa ka wah bad pynïap ïa ki dohum bad lada ka lap kan leh da kaba tyngeh bad ban ai sha ki bor jong ka aiñ.
U la kyntu ïa ki paidbah kiba thied ba pet ïa ki dohkha ban long kiba husiar bad kim dei ban thied kulmar ïa ki dohkha pnar ha ïew, ïoh lehse ki dei ki dohkha kiba shah ktah na ka jingber dawai bih kaba lah ban ktah pat ïa ka koit ka khiah u briew bad wanrah ïa ka jingjia kaba sngewsih.
Une u nongïalam u la khot ka jingïatreilang jong baroh ban pynneh pynsah ïa ki dohkha-dohpnat bad ban ïakhun pyrshah ïa ki runar ba pynjot bad pynïap ïa ki dohum.
