Tura, Rymphang 02
U nongtrei mon sngewbha na Tura, Cherian Momin ha ka Sngi U Blei, u la ñiew ba ka jingdawa ban ïoh ïa la ka jong ka thup kyrteng jong ki nongthep ‘vote’ na ka bynta ki nongshong shnong ki bym dei ki ‘riewlum ha GHADC da ka ‘Sarvadaliya Sammelan’, ka seng rit paid, ym tang ba ka long ka bym lah ban pynneh-pynsah ha ka liang ka aiñ hynrei ka dei ruh ka jingpyrshang ban thom ïa ki lad jingïada jong ka Riti Synshar ka ri kaba la pynbiang hapoh ka Khyrnit ba Hynriew jong ka Riti Synshar haba ïadei bad ki trai-ri trai-muluk ‘Schedule Tribe’.
Kane ka jingkynthoh u Momin ka wan hadien ka jingïalang kaba la khot da ki nongïalam rit paid hapoh ka lama ‘Sarvadaliya Sammelan’, ban ïakren halor ka ‘GHADC Bill’ na ka bynta ka thup kyrteng ki nongthep ‘vote’ ba kyrpang, ha Nayapara, Mahendraganj, ha ka Sngi U Blei.
“Ka GHADC kam dei ka bor synshar kyllum, kam dei ruh ka rynsan ban ïakren saiñ pyrthei da ki kynhun ki bym dei ‘riewlum. Ka dei ka tnat treikam kaba synshar hi dalade kaba la bthah da ka Riti Synshar, kaba la seng tang da ka jingthmu ban pyntikna ïa ka jingsynshar hi dalade na ka bynta ki trai-ri trai-muluk Garo. Kano-kano ka jingpyrshang ban pynbeit thymmai ïa ka rukom jied nongmihkhmat jong ka ha ka liang jong ki bym dei ki ‘riewlum ka long ka jingthombor ïa ka Riti Synshar jong ki ‘Schedule Tribe’ bad dei ban kyntait khlem jingartatien,” ong u Momin.
U Momin u la kdew ba ka jingshah kyntait jong ki bym dei ‘riewlum na ka thup thep kyrteng ki nongthep ‘vote’ jong ka GHADC kam dei ka jingleh shiliang ne ka jingpynkylla na ki nongrim jong ka Riti Synshar; hynrei ka dei ka lad jingïada kaba la pynrung ha ka aiñ ban ïada na ka jingshah kyntait ha ka saiñ pyrthei jong ki jaidbynriew trai-ri trai-muluk hapoh u pud synshar lajong.
Ki nongthaw ïa ka Riti Synshar ki la ithuh ïa ki jingshah leh bymhok bad ki jingeh kiba ki ‘Schedule Tribe’ ki mad, bad dei na kata ka daw ba la pynlong aiñ ïa ka Khyrnit ba Hynriew kum ka aiñ kaba pynskhem ban pynneh ïa ka jingsynshar hi jong ki.
Ka jingdawa kaba mynta ban ïoh ïa ka jingmihkhmat jong ki bym dei ‘riewlum ka long, namarkata, ka jingthombor ïa ki nongrim ba kongsan jong ka jingsynshar ‘riewlum bad ka jingpynkyllem ka bym lah ban shah, u la ong.
Katkum ka jingong u Momin, ka jingkynthoh ba ki nongshong shnong ki bym dei ‘riewlum ki dei ban ïoh ïa ka hok jied nongmihkhmat ne ban shah kyntait ha ka jaka jong ka GHADC ruh ka long kaba bakla ha ka liang ka aiñ.
U Momin u la kyntu ïa ki bor synshar jong ka Riti Synshar, ki nongthaw aiñ, bad ka Judiciary ban shimkhia ïa kane ka kam bad ban khanglad ïa kano-kano ka sienjam kaba buh jingma ïa ka jinglong kyntang jong ka Khyrnit ba Hynriew.
“Ka Sorkar Jylla bad ka Sorkar Pdeng ki dei ban leh da kaba tyngeh ban khanglad ïa ki jingwan tuklar pyrshah ïa ka Riti Synshar ka ri ha ka synshar ka khadar jong ka GHADC,” u la dawa.
