Shillong, Jymmang 25
Hadien ba ka Khasi Hills Autonomous District Council (KHADC) ka la weng shipor ïa u Syiem ba pura ka Hima Mylliem u Pa’iem Ainam Manik Syiem kum u Syiem ka Hima Mylliem, u Pa’iem Alban Fredrick Syiem ha ka lah sngi u Blei u la shimti kum u Acting Syiem ka Hima.
Ka kynhun u Lyngdoh ha ryngkat ki Myntri ka Hima Mylliem ki la pdiang burom bad pynkup spong ïa u Pa’iem Alban ba un shong ha ka Khet Syiem ha ka ophis treikam jong ka Hima kaba don ha Mawkhar Shillong.
Kum ban shu kdew u Pa’iem Ainam Manik Syiem u la shah weng kam shipor na ka khet Syiem ha ka 22 tarik u Jymmang 2026, halor ka jingkynnoh ka KHADC ba ka Hima ha ka jingsynshar u Pa’iem Ainam ka la kyntait ban siew ïa ka khajna sha ka District Council.
Haba kren sha ki Nongthoh khubor u Pa’iem Alban Fredrick Syiem u ba la shimti ïa ka kam kum u Acting Syiem ka Hima Mylliem u la ïathuh ba un buh hakhmat eh ban wanrah ïa ka jingsynshar kaba khuid ba suba bad ban ïoh ka jingïatreilang hapdeng baroh ki Myntri jong ka Hima.
Haba kylli haba ïadei ka jingkynnoh ka KHADC ba ka Hima kam pat siew ïa ka khajna, la ka Executive Dorbar ba thymmai kan siew ne em, u Pa’iem Alban u la ong ba, um pat lah ban kren eiei halor kane ka bynta namar ba u dang shu wan ban shimti kum u Acting Syiem bad kane ka kam ka dei ha ka jingsynshar ka EC barim kaba la ïaid naduh u snem 2018 bad ïa ka jingpynshitom ka shong ha ka KHADC.
U la pynshai ha kaba ïadei ka pisa ba ka Hima kam pat siew sha ka District Council ka dei kaba T. 3.24 klur, ym kumba don ka jingong ba ka dei haduh T. 3000 klur tyngka.
Haba bynrap u la ong ba ha kane kajuh ka sngi ba u shimti ïa ka kam kum u Acting Syiem, yn thaw noh ïa ka Executive Dorbar Hima khnang ban lah ban pynïaid beit ïaid ryntih ïa ki kam jong ka Hima baroh kawei.
