Shillong, Jymmang 25
U MLA ka NPP, Bah Gavin Mylliem ha ka Lah Sngi U Blei u la ong ba ka jingkhang tih dewïong ha u snem 2014, ka la pynthut shi kat dei eh ïa ka lad kamai ha ka thaiñ Sohra, ha kaba ki shnong kiba shaniah ha u dewïong, kum ka Laitryngew bad Mawkma, ki la duh noh ïa ka lad kamai kaba kongsan jong ki.
U la bynrap ba ka kam jngohkai pyrthei naduh katei ka por ka la mih bujli kum ka bynta ba kongsan ban pynkhie im pat ïa ka ïoh ka kot ha ka thaiñ.
“Hooid ngim lah ban len ïa ka jingshisha ba ha ki bun snem ba la dep, naduh ba la khang tih dewïong ha u snem 2014, ngi don ki jaka kum ka Laitryngew, Mawkma ha kito ki snem hashuwa u 2014 – kiba bun na ki, ki shaniah ha u dewïong na ka bynta ka ïoh ka kot,” la ong u Bah Gavin sha ki nongthoh khubor.
Une u MLA ka Sohra u la ong ba kane ka jingkhang ka la pynbor ïa ka imlang-sahlang ban wad ki lad ki lynti, ha kaba ki kam jngohkai pyrthei suki-suki ki la kylla long ka lad ban phai khmat hadien jong kane ka jingshah ktah.
“Hynrei hadien ka jingkhang tih dewïong, phim lah ban len ïa ka jingshisha ba ka kam jngohkai pyrthei ka la ïarap shisha ban kyntiew ïa ka ïoh ka kot jong ki paidbah ha katei ka thaiñ,” u la ong.
U Bah Gavin u la kdew ruh ba ka Sohra ka la khring ym tang ïa ki nongwan jngohkai pyrthei kiba napoh ka ri.
“Ka Sohra ka la lah ban khring ïa ki nongjngohkai ym tang na ka ri jong ngi hynrei wat ïa ki nongjngohkai kiba na kylleng ki bynta jong ka pyrthei,” u la ong.
Ha kajuh ka por, u la ai khublei ïa ka jingïashim bynta jong ki paidbah ha ki projek ba la kyrshan da ka Sorkar na ka bynta ka jingkylla.
“Baroh ki shnong ki kner ruh ïa ka jingkyrshan sha ka Sorkar bad khamtam eh da kine ki projek hapoh ka skhim ‘PM-Divine’, World Bank, skhim ADB, ngi la lah ban ïohi ïa ka bynta kaba donkam ban ïasam bad ka Sorkar bad ki shnong ki thaw ruh ki la pdiang ïa ka jingtyrwa na ka Sorkar,” ong u Bah Gavin.
“Namar kane ka jingshisha, ngi sngewthuh ba ki briew na ka thaiñ bad ki paidbah ki la sngewthuh ba kane ka bynta ba kyrpang ka la noh synñiang shisha sha ka ïoh ka kot jong ka thaiñ,” u la bynrap.
Wat hapdeng ka jingnang kiew jong ki kam jngohkai pyrthei, u Bah Gavin u la kubur ba ka Sorkar ka don tang khyndiat eh ki lad ban pynlong ïa ki jaka sah shimet kiba bit dor katba ka jingdawa ka nang jur.
“Kata ka dei ka jingkylli kaba eh bha namar hooid, ban pynbeit ïa ka dor haba phai bad ki jaka sah jong ki ‘riew shimet, ka long kaba eh bha na ka liang ka Sorkar ban pynbeit ryntih,” u la ong haba kylli shaphang ka jingpynbeit ryntih ïa ka dor.
Shuh shuh u la ong ba ki lad ki lynti kiba kham paw ha Sohra ki dang duna.
“Kumba ka long mynta, nga tharai tang ka ‘Jiva’, ‘Polo Orchid’ ki jingtyrwa ïa ki jaka sah kiba rem dor, kumta, hooid to ngin peit kaei kaba ka Sorkar ka lah ban leh ha kine ki sngi ban wan ban pyntikna ba ïa ki jaka sah kiba bit dor yn pynbiang sha ki paidbah,” bynrap biang u Bah Gavin.
