Shillong, Jymmang 25
Ka President ka ri India, ka Droupadi Murmu ka la aiti ïa ka khusnam ‘Padma Shri’ sha u Bah Hally War uba na Meghalaya ha ka jingïalang ‘Civil Investiture Ceremony-I’ kaba la pynlong ha Rashtrapati Bhavan ha ka Lah Sngi U Blei.
U briew uba la pawnam ha ki kam ïada mariang bad u nongsumar ïa ka jingstad tynrai jong ki Khasi, u Bah Hally War u la paw pyrthei kum ka dak jong ka rukom im kaba ïaineh bad ka jingpynwandur tynrai.
La kha ïa u ha ka 5 tarik u Rymphang, 1957, bad u la aiti palat san phew snem ban pynneh-pynsah ïa ka mariang, ban pynkhlaiñ ïa ka jinglah ban ïaineh jong ka imlang-sahlang bad ban kyntiew ïa ka jingïahap bad ka mariang lyngba ka kam “bio-weaving’ kaba hyndai.
Naduh ba u dang shiphew snem ka rta, u Bah War u la pynheh-pynsan bad pynwandur ïa ki tynrai jong u dieng ‘Ficuselastica’ ban thaw ïa ki jingkieng jri ba pawnam jong ka East Khasi Hills ha Meghalaya.
Kine ki jingtei kiba phylla ki pynïasoh ïa ki shnong kiba jngai katba ki long kum ki nuksa jong ka jingpynwandur ba ïaineh kaba don tynrai ha ka jingstad tynrai.
Napdeng ki jingnoh synñiang jong u kiba la pawnam tam, ka dei ka ‘Umkar Living Root Bridge’, kaba pyni ïa ka jingpynheh-pynsan da ki phew snem bad ka jingsngewthuh kaba jylliew shaphang ki jinglon-jingman jong ka mariang. Ka jingkieng ka dang bteng ban ai ka jingïaid lynti kaba shngaiñ na ka bynta ki pateng katba ka dang pyni ïa ka jingïadei hapdeng ki briew bad ka mariang. Ha ryngkat ka jingstad jong u ha kane ka kam, u Bah War u la don ka bynta kaba kongsan ha ka ban kyntiew ïa ka imlang-sahlang bad ka ïoh ka kot jong ka thaiñ jong u.
Da kaba hikai ïa ki longïing kiba don ha ka thaiñ bad ban pynhiar pateng ïa ka dustur jong ka jingthaiñ ïa ka jingkieng jri, u la pyntikna ïa ka jingpynneh-pynsah ïa ka pateng kolshor kaba kyrpang.
Ki jingpyrshang jong u ki la pynkhlaiñ ruh ïa ka jinglong-jingman jong ka mariang jong ka lum Sohra bad pynshlur ïa ka kam jngohkai pyrthei kaba lah ban ïaineh, kaba ïalam da ki nongshong shnong ha ka thaiñ.
Watla u im ka jingim kaba sngewrit kum u nongrep uba rep kwai bad sohmarit, ki jingnoh synñiang jong u Bah War ha ka jingsumar ïa ka mariang bad ki rukom pynneh-pynsah tynrai ki la wanrah ïa ka jingithuh kum uwei na ki ‘riewshlur bashisha jong ka ri.
Ka khusnam ‘Padma Shri’ ka ai jingithuh ïa ka jingaiti jong u Bah Hally War ha ka jingim jong u ban pynneh-pynsah ïa ka mariang bad ka pyni ïa ka jingdonkam jong ki jingnang-jingstad tynrai ha ka ban weng ïa ki jingeh ha ka mariang ha kane ka juk mynta.
Ki kynrem ki lyndan kiba la ïadonlang ha kane ka sngi ki long u Vice-President ka Ri India, u Myntri Rangbahduh ka ri India bad u Myntri ka tnad kam pohïing ka Sorkar Pdeng.
