Nongstoiñ, Jymmang 25
U Chief Executive Mem-ber (CEM) ka Khasi Hills Autonomous District Council (KHADC) u Bah Winston Tony Lyngdoh u la kyntu ïa ki paidbah ba wat ym don hapdeng ka jingartatien ne ka jingtieng lane ka jingsmiej ka dohnud ha ka jingmut ka jingpyrkhat hynrei ban mih shakhmat ban ai biang sa shisien ïa ka jingkyrshan ïa ka seng da kaba kyrshan ïa u Dr. Batskhem Myrboh uba dei u kyrtong ka VPP ha ka ilekshon MP shiteng samoi.
Ïa kane, u CEM ka KHADC u la kren bad pynpaw ha ka jingïalang ai jingpynshai jong ka Voice of the People Party (VPP) kaba pynlong ha ïew Langpih halor ka ilekshon MP shiteng samoi.
U Bah Winston Tony Lyngdoh u la ong, “Nga pyrkhat dang lai bnai kynthih ngi la duh ïa u Dr. Ricky Synkon (bam kwai ha dwar U Blei) bad haba kiwei ki party ki la sei ïa ki kyrtong kala don ruh ka jingkren kaba saitmet kaba pang met hynrei nga, ngan ong tang katne, katno ka jinglong ka jingim jong u Bah Ricky ka jingkhraw ka jingmut jingpyrkhat ka jong u bad ka jingdon burom ka jong u ba kine kiwei kiba kren beiñ, ha kaba ka por ba i dang im kim nud ban kren beiñ ki kren mynta ba im don shuh ha sla pyrthei”.
Shuh shuh u la ong, kine ki ban ïaleh pyrshah mynta ha ka por ba dang im kim nud ban ang ka shyntur ne ban kynthoh ïa i hynrei ki ap tad ynda u briew um don shuh ha sla pyrthei ban kren beiñ bad kren khoh ïa u.
“Ki paidbah nongshong shnong jong ka jaidbynriew ka jong ngi kim dei ki paidbah ki bym don ka jingtip, ka jingnang ka jingstad bad ka jingshemphang, ki ïohi kiei ki kam ba u la leh hangtei ha Parliament,” u la ong.
U Bah Winston u la ong ruh ba u Dr. Ricky ha ki ar snem ba u la trei kam, u la rah ïa ki mat ki jura jong ka Ri kaba ieit ka jong ngi, ba kiwei khadsan snem mynshuwa kim lah ban rah, da kaba u la bynrap ba ïa kane yn ieh ha ki paidbah ba kin pynshongdor pynshong nongrim ïa ka lynti ïaid jong une u rangbah.
U la ong ruh, “Nga kwah ba phin puson sa kane kawei, ngi la ïoh ban sei sa ïa uwei u samla rangbah na ka party ka jong ngi u Dr. Batskhem Myrboh kumba ngi ïohsngew, u la don bad ka party naduh ka sngi kaba sdang, u dei u nongaiktien jong ka party, u dei u samla rangbah uba shemphang uba proh ka jingmut jingpyrkhat bad kaba sngewtynnad ba um ju aili ha kaba ïadei bad ka mat ka jura jong ka jaidbynriew”.
Shuh shuh u la ong ruh ba ha ka lynti ïaid kin nang bun ki jingeh kin nang bun ki jingtynjuh hynrei tang kawei “Ngi kum ki nongïalam da lei lei ruh ngin nym randien, da lei lei ruh ngin ym shongthait, da lei lei ruh ngin nym ailad ïa ka bor jong u bymman ba kan wan ban tyllep ïa ka ri kaba ieit ka jong ngi”.
U CEM u la pynpaw ruh da kaba ong, “Nga ngeit skhem lyngba ka jingkyrshan ka jong phi ki paidbah, nga sngewthuh ba kane ka lynti ïaid nangne shakhmat kan long ka lynti ïaid kaba nang iphuh iphieng, kan nang long ka jingïoh bor ïa ngi kat dang ïaid ki sngi ki por”.
Ha katei ka sngi la ïadonlang ruh naduh u Bah Juristman Ïawphñiaw, MDC ka Nongstoiñ, Bah Powell Sohklet MDC ka Mawthadraishan lem bad kiwei kiwei nalor ki nongshong shnong jong ka thaiñ kiba la wan ban pynshit pynshngaiñ ïa ka jingïalang.
