Shillong, Jymmang 25
U Myntri Rangbah ka Jylla Conrad K Sangma ha ka sngi Nyngkong u la leit ïakynduh ïa u Myntri ka tnad Pule Puthi ka Sorkar Pdeng Dharmendra Pradhan ha New Delhi ban pynpaw ïa ka jingsngewnguh ïa ka jingtuklar jong u ban sdang ïa ki kam na ka bynta ka jingthung ïa u Vice Chancellor ka North Eastern Hill University (NEHU).
Ha ka shithi bala ai ha u Myntri ka Sorkar Pdeng, u Myntri Rang-bah u la ong, “Kane ka sienjam kala wanrah ïa ka jingpynthikna kaba donkam bad la pdiang sngewbha ïa ka da baroh ki briew kiba don hapoh ka University. Ka long kaba kongsan ba ïa kane ka sienjam la pynïaid shakhmat kham kloi bad kaba da pyrkhat bha”.
U la kyntu ïa u Myntri ka tnad Pule Puthi ba dei ban pynlong ïa ka jingjied da kaba leh janai bha, haba pynthikna ba ym dei ban pynslem ïa ka jingthungkam, na ka bynta ka jingmyntoi jong kane ka jaka pule.
“Kaba donkam lang ka long ka jingdonkam ban ithuh ïa u kyrtong uba wanrah ym tang uba don ïa ka kyrdan jingpule kaba biang bad ba bit ban pynïaid kam, hynrei uba don ruh ïa ka jingshemphang, ka jingbishar bniah bad ka jinglong nongïalam ki ban btin lynti ïa ka NEHU lyngba ki jingeh kiba don mynta,” u la ong ha ka shithi.
U la shim ruh ïa ka kabu ban kyntu ïa u Myntri ba un tuklar lang halor ki san tylli ki project bala mang hapoh ka Pradhan Mantri Jan Vikas Karyakram (PMJVK) na ka bynta ka North Eastern Hill University (NEHU), Tura Campus, Meghalaya, kaba dang ban pyntreikam. Ka song pisa ba T.35 klur la dep ban pynlait da ka Ministry of Minority Affairs ban pyntrei ïa ki jingtei.
“Kine ki project ki dang long kiba kongsan bha ym tang ïa ka University hynrei ïa ka thaiñ Ri-lum Garo baroh kawei, namar ki long kongsan bha ban pynbiang ïa ki jingtei jong ki jaka pule Higher Education bad pynurlong ïa ka jingangnud jong ki samla pule bad ka imlang sahlang,” u la ong.
Lah ban kdew ba ka Ministry of Minority Affairs kala ai jingmut kham mynshuwa ïa ka CPWD kum ka Agency ban pyntrei ïa ka project ha ka jingïalang bishar kam ba long ha ka 14 tarik Risaw, 2025.
U Myntri Rangbah u la batai ruh ïa u Myntri ka Sorkar Pdeng halor ka Captain Williamson Sangma State University (CWSSU), kaba la pynroi kum ka Greenfield development model, bad pan ïa ka jingïarap song pisa na ka bynta ban tei ïa ki jingtei, pynïar ïa ka pule dangle, ki laboratory, ki hostel ki samla pule, ki kam kiban tei ïa ki nonghikai, bad ki prokram ai jinghikai ïa ki nonghikai.
U la kyrpad ruh ïa u Myntri ban mang ïa ka jingïarap song pisa sha ka CWSSU hapoh ka MERU (Multi Disciplinary Education and Research University) Vertical jong ka PM-USHA, kaba ki University ka Sorkar Jylla ki lah ban ïoh ïa ka grant kaba kot haduh mar T.100 klur.
“Ka Meghalaya kam lah ban ïoh ïa ka jingkyrshan hapoh kane ka Vertical mynshuwa namar ka jingbym don jong ka State University. Da ka jingtreikam ka CWSSU, ka Jylla ka don jingkyrmen ban ïashim bynta ha ka rukom kaba don jingmut ha kane ka jingpyrshang kaba kongsan jong ka ri,” ong u Myntri Rangbah ha ka shithi.
