
Shillong, Rymphang 02
Ka Meghalaya Editors’ & Publishers’ Association (MEPA) bad ka Shillong Press Club (SPC) haba pynrem jur ïa ka jingkynnoh khlem nongrim jong u nongïalam ka VPP, ki la aipor 5 sngi ïa u President ka Voice of the People Party (VPP) bad MLA ka Nongkrem Bah Ardent M Basaiawmoit, ba un panmap halor ki jingkynnoh lamler ïa ki ar tylli ki lad pathai khubor-ka Batesi TV bad ka T7.
Ha ka shithi ba la phah sha u President ka VPP, ka MEPA bad SPC ki la maham ba lada um panmap hapoh kitei por ba la buh hadien ba la ïohpdiang ïa ka shithi, na ka liang kine ar tylli Synjuk kim banse ban leh eiei pyrshah ia u (Bah Ardent) bad ïa ka seng jong u (VPP).
Ka MEPA bad SPC ka la pynrem jur ïa ka jingkynthoh jong u Bah Ardent ïa ka Batesi TV bad T7 ha ka jingïalang paidbah ba la long ha Nongstoiñ, West Khasi Hills ha ka 15 tarik Kyllalyngkot bad ong ba kane ka jingkynthoh ka dei ka jingpynjah burom ïa kine ar tylli ki Lad Pathai Khubor-bad buh ruh ha ka jingma ïa ka jingshngaiñ ka ïaid ka ïeng jong ki nonglum khubor jong kine ar tylli ki lad pathai khubor.
“Kum ki Nonglum Khubor, ka dei ka kamram jong ngi ban pathai ïa ki khubor kiba ïadei bad ka Jylla lem bad ki nongshong shnong jong ka. Ki jingkynnoh ba khlem nongrim kum ki jong phi (Ardent) ka buh ha ka jingma ïa ka jingshngaiñ, ka jingshaniah bad ka ïaid ka ïeng jong ki para nonglum khubor jong ngi” ong ka shithi ba la soi da u President ka Shillong Press Club, Bah Deimaia Siangshai bad u Vice President ka MEPA, Rajiv Choudhury.
“Ngi dawa ïa ka jingpynshai ba mardor halor kane ka jingkynthoh jong phi ha kane ka jingïalang paidbah naba ki khubor ba la pynmih da kine ki lad pathai khubor ki dei kat kum ka jingtip jong ngi, kiba shisha bad ka dei ka bym don kano-kano ka jingpyrshang ban ktah matïong ne pynthohbria ïano-ïano ruh ne ki seng saiñ pyrthei” ki la bynrap.
Ka MEPA bad SPC ka la ong “Khatduh eh, ym don satia kino-kino ki seng saiñ pyrthei, ki seng ne seng kiengatiar lane ki nongïalam jong kino-kino ki kynhun kiba lah ban buh jingkylli ïa ka kam jong ngi haba ngi dang trei ïa ka kam kum ki nongthoh khubor bad nonglum khubor.