
Jowai, Rymphang 02
Ka Dorbar Shnong Khliehtyrshi ka la rai ban ai ka jingkyrshan kaba pura ïa u Chief Executive Member (CEM) barim ka Jaiñtia Hills Autonomous District, u Bah Madonbai Rymbai uba la mih ban aireng biang ïa ka ilekshon MDC na Amwi Khliehtyrshi.
Ïa kane ka rai, ka Dorbar Shnong Khliehtyrshi ka la shim ha ka jingïalang kaba long ha ka 31 tarik Kyllalyngkot ha phyllaw jong ka Ïing Dorbar jong ka shnong Khliehtyrshi.
U Waheh Shnong Khliehtyrshi, Bah Kitbok Rymbai haba kren u la ong ba ïa kane ka rai la shim hadien ba u Bah Madon Rymbai u la phah ka shithi sha ka Dorbar Shnong ban pan ïa ka jingkyrshan na ka bynta ba un aireng biang ha kane ka ilekshon MDC sha ka JHADC.
U la ong ruh ba ki don lai ngut ki kyrtong napoh shnong Khliehtyrshi, u kyrtong ka VPP u la ai ka shithi kum ka jingpyntip, katba u kyrtong NPP kim ïoh kano-kano ka shithi bad dei halor kane ka jingkyrpad u CEM barim, ka Dorbar Shnong ka la khot ïa ka jingïalang ban shim ïa ka sur jong u paidbah.