Nongstoiñ, Rymphang 02
U samla Michael Thongni uwei na ki samla rangbah jong ka thaiñ Nongstoiñ, uba dei ruh uwei na ki nong aplai ïa ka tiket na ka VPP, u la shim ïa ka rai bad kohnguh ïa ki paidbah ban mih shakhmat ban ïakhun ha kane ka ilekshon MDC kum u kyrtong shimet na Nongstoiñ District Council Constituency.
Kane ka jingmih shakhmat bad shim rai kaba kyndit jong u samla Michael Thongni ban ïakhun ïa ka ilekshon ha kane ka kynti ba mynta lehse kan nang kham pynshongshit shuh shuh ïa ki paidbah jong ka Nongstoiñ bad ïa ki seng saiñpyrthei bapher bapher jong ka Nongstoiñ Konstitwensi.
U samla Michael u la ong, ka jingmih ka jong u shakhmat ban ïakhun ha kane ka ilekshon kam dei ba u don kano kano ka daw ïa ka VPP wat la um shym la ïoh ïa ka tiket hynrei hadien hynñiew sien ba ki samla na ki kynhun bapher bapher kumjuh ki ‘riew rangbah jong ka thaiñ Nongstoiñ kynthup ki longkmie bad kiwei kiwei ki la leit ban kyrpad ïa u bad ban pynbor ba un ïakhun.
Shuh shuh u samla Michael u la pynpaw sha ki nongïalam ka VPP da kaba u la ong ruh ba “Ko nongïalam baieit, ngam shym la don kano-kano ka daw ïa kane ka seng, nga sngewtynnad bad nga ieit naduh ka mynsiem hynrei nga dei u nongshakri paidbah ngam lah ban kyntait ïa ki paidbah wat lada ki long tang khyndiat ruh lehse hynrei nga hap ban mynjur namar kumba ka ïing ka sem ruh ka la aibor ïa nga ban ïaid shakhmat bad ki la buh ha nga ïa ka jingtyrwa ha u paidbah ngan pyndem ha ka sur u paidbah ngan phai khmat ha u paidbah bad nga pynbna ba ngam long shuh u dkhot jong ka seng naduh kane ka sngi kaba nga la rai ban ïakhun ïa ka ilekshon.”
