Shillong, Rymphang 02
U Bah Marvel Sungoh uba dei u nongtrei ha ‘My Home India’ ba shong ba sah mynta ha nongbah Delhi, ha ka Sngi U Blei u la ïoh ban leit ïarap ïa ki khatwei ngut samla shynrang na jylla Meg-halaya kiba la shah thok haba ki leit trei sha Noida, kaba hap ha jylla Utter Pradesh.
Kine khatwei ngut ki samla shynrang ki dei kiba don hapoh 19 snem ka rta kiba dei 6 ngut na ki Khasi Jaiñtia bad 5 ngut ki dei ki Garo.
Haba ïoh ban ïakren bad u Bah Marvel Sung-oh lyngba ka phone u la ïathuh ba kine ki samla shynrang ki la dep shah hikai ban shna mobile phone kumba lai bnai ha Guwahati, kumta na Guwahati ki la phah ïa ki ban leit trei shna mobile phone sha Noida hynrei ynda la poi ha katei ka jaka kim shym la ïoh ban shna mobile hynrei ki dei tang ki nongïarap (helper) ïa ki briew jong ka kompeni.
U la ïathuh kine ki samla ki la poi sha Noida la kumba saw sngi eiei hynrei haba kim sngewïahap ïa ka kam ba ki trei katkum ka jingbatai na Guwahati ki la pyntip noh sha ki bahaïing bad bahaïing ruh ki la pyntip sha u ban leit ïarap ban phah wan noh ïa ki sha Meghalaya.
“Haba nga la poi sha Noida nga la lap ïa ka jaka sah jong ki, ka long kaba jaboh namar ki sah tang kawei ka kamra, ki hap ban thiah bad bam hajuh ka kamra,” u la ong.
U la ïathuh biang ba kine ki samla ki mad shibun ka jingeh namar ka jingsiew kaba rit hynrei ka jaka sah pat kaba rem bad ka bam kaba rem kaba buh jingeh ïa ki haba ki sah sha ri nongwei.
U Bah Marvel u la ïathuh ba mar shu poi ma u ha jaka sah, ki la sngewkmen bad lai ngut napdeng kine khatwei ngut ki la dep thied tiket ban leit phai ïing da ka liengsuiñ katba kiwei pat kin sa leit phai ha kiwei ki sngi ynda ki la ïoh pisa.
Shuh shuh u la pyntip ba ka jingkyrpad ki bahaïing ïa u ban leit ïarap ïa ki namar kine ki khynnah kim tip lynti shuh ban leit phai sha Meghalaya.
Kumta u la kyntu ïa ki samla lada ki kwah ban leit trei sha kiwei ki jylla ki dei ban da wad jingtip kham bniah khnang ban ym buh jingeh ïa ki.
U la pyntip ruh ba lada don kino-kino ki samla kiba ïakynduh jingeh haba ki poi sha Delhi, Mumbai, Kolkata ne kylleng ka ri India ki lah ban call ha u number phone jong u 7002802561 namar u long uba la kloi ban ïarap ha kano-kano ka por.
