Mairang, Rymphang 02
Ha ka Sngi Saitjaiñ jong ka taïew ba la dep, lai ngut ki kyrtong ki ban ïakhun ha ka ilekshon MDC sha ka ïingdorbar jong ka Khasi Hills Autonomous District Council (KHADC) ba kynthup na ka Mairang Nongkhlaw bad Parïong Mawthadraishan District Council Constituency ki la leit ban pyndep ïa ka jingthep kyrteng hakh-mat ki Returning Officer hapoh ka shlem treikam jong u Deputy Commissioner ka Eastern West Khasi Hills District.
Kitei lai ngut ki kynthup ïa ka Kong Phinda Warjri, kyrtong ka Hill State People Democratic Party (HSPDP) na ka 24 Parïong Mawthadraishan Konstitwensi, kaba dei ruh ka hynmen jong u MLA ka Mawthadraishan bad Myntri Sorkar u Bah Shakliar Warjri, nangta u kyrtong ka Congress u Bah Lawanpynshngain K War na ka 23 Mairang Nongkhlaw District Council Constituency, u Bah Tailin Lyngkhoi kyrtong ka Congress na ka 24 Parïong Mawthadraishan konstitwensi.
Ha katei ka jingleit thep kyrteng, la ïoh ban sakhi ba ïa ka kyrtong jong ka HSPDP la wan ban synran da ki nongkyrshan Sing kiba la wan poi da ki spah ngut ban pynshongshit bad ai mynsiem ïa la ka kyrtong ha kane ka ilekshon MDC.
Kumjuh ïa ki kyrtong jong ka Congress la synran lang da ki nongkitkam bad ki paidbah nongkyrshan.
Ka Kong Phinda Warjri haba kren sha ki lad pathai khubor hadien ba la dep ban thep kyrteng ka la ong ba ka don ïa ka jingsngewskhem ban jop ha kane ka ilekshon namar ka jingieit jong ki paidbah.
Shuh shuh ka la ong ruh ba ka thong kaba hakhmat eh ka jong ka, ka long khamtam eh na ka bynta ki longkmie jong ka konstitwensi ha kaba kan leit sha District Council ban pynneh pynsah ïa ki riti ki dustur kumba la buh da u longshuwa u manshuwa bad ka la ong ruh ba kan pynskhem ïa ka nongrim ban ai jait sha ka kmie bad kan ïeng pyrshah lada don ki briew kiba pyrshang ban pynkylla.
Katba u kyrtong ka Congress u Bah Lawanpynshngain uba dei u khun jong u (L) Kitdor Syiem, MLA barim ka Mairang haba kren bad ki lad pathai khubor u la ong, ka jingkwah ban ïakhun ïa kane ka ilekshon ka long ba ki paidbah hapoh ka Mairang kim pat hun naba rem ïa ka ilekshon MLA, kumta ha kane ka kynti ki dang shaniah hi ïa ka Congress.
Kumjuh na ka liang u Bah Tailin Lyngkhoi kyrtong ka Congress na Parïong Mawthadraishan pat u la ong ba ka don hi ka mon bad ka jingthrang naduh mynsiem ban shakri ïa u paidbah kaba la pynlong ïa u ban ïakhun ïa kane ka ilekshon.
Shuh shuh u la ong ruh ba kum u nongsaid aiñ u ïohi ïa ka jingdonkam ki nongthaw aiñ ban pynneh pynsah ïa ki riti dustur bad ban pynbha ïa kaei kaba la don hapoh ka District Council bad kumjuh ruh ban pynthymmai ïa ki aiñ.
