235 bilor ka kyiad & 10 kilo tam u kynja ïoh kurup na Mawryngkneng

Ha kaba ïadei bad kane, la dep ban pynrung ïa ka mukotduma ha thanat Mawryngkneng hapoh ka kyndon C/ No3(2)25 u/s 20b(ii)(b)/29 jong ka NDPS Act.

Shillong, Rymphang 03

Ki pulit Anti Narcotic Task Force (ANTF) jong ka East Khasi Hills ha ryngkat ka jingïatreilang bad ki pulit jong ka Mawryngkneng ki la ïoh ban kurup da ki spah bilor ka kyiad, u kynja bad ki jingdih buaid na kawei ka kali ha thaiñ Mawryngkneng.

Kane ka jingïoh kurup ïa kitei ki jingdih buaid ka la long hynnin ka miet, hadien ka jingïoh jingtip ha kaba na ka liang jong ki pulit ki la bat noh ïa kawei ka kali Tata Yodha kaba don ïa u registration number MZ01-Z-3654 kaba dang don ha lynti na Shillong ban hiar sha Mizoram bad ha kaba la ïoh kurup ïa kitei ki jingdih buaid.

Ki tiar ba la ïoh kurup ha kane ka miet, ki long ar tylli ki mobile phone, kawei ka license ñiah kali, kawei ka sofa rong jyrngam, ha kaba la buhrieh ïa u jingdih buaid, u kynja haduh 10.455 kilo, ki bilor kyiad haduh 235 tylli bad la kurup noh ïa katei ka kali kumjuh.

Nalor kitei, ki pulit ki la rah noh ruh ïa ki lai ngut ki briew ba kynthup ïa ka Sabina Lalnunmawiii (23 snem), u Lalrinmawia Chenkua (19 snem) bad u Lalrosanga (28 snem) kiba dei na ka jylla Mizoram, kiba la don ha katei ka kali kaba la ïoh ban bat.

Ha kaba ïadei bad kane, la dep ban pynrung ïa ka mukotduma ha thanat Mawryngkneng hapoh ka kyndon C/ No3(2)25 u/s 20b(ii)(b)/29 jong ka NDPS Act.