
Jowai, Rymphang 03
Haduh 117 ngut ki kyrtong na ki seng saiñpyrthei bapher-bapher kumjuh ki kyrtong shimet kin ïa aireng na 29 tylli ki konstitwensi ha Rilum Jaiñtia kynthup ka West Jaiñtia Hills District bad East Jaiñtia Hills District ha ka ilekshon MDC sha Jaiñtia Hills Autonomous District Council (JHA-DC) ka ban long ha ka 21 tarik mynta u bnai.
Ki kot ki sla jong baroh 117 ngut ki kyrtong na 29 tylli ki konstitwensi kiba thep kyrteng ha DC ophis Jowai, ha ophis SDO Amlarem, West Jaiñtia Hills District bad ha ophis DC Khliehriat, East Jaiñtia Hills District ki long kiba biang lut ha ka Scrutiny ne ka jingbishar ïa ki kot ki sla kaba la long ha ka 3 tarik Rymphang.
Ha West Jaiñtia Hills District baroh ki kyrtong ki don 74 ngut na ka bynta 19 tylli ki konstitwensi katba ha East Jaiñtia Hills baroh ki kyrtong ki long 43 ngut na ka bynta 10 tylli ki MDC konstitwensi.
Na 29 tylli ki District Council Constituency, ka National People’s Party (NPP) ka la pynïeng 28 ngut ki kyrtong kynthup 19 ngut ha West Jaiñtia bad 9 ngut ha East Jaiñtia Hills District.
Ka Voice of the People Party (VPP) ka la pynïakhun ha baroh 29 tylli ki konstitwensi kynthup 19 ngut ha West Jaiñtia bad 10 ngut ha East Jaiñtia Hills District.
Ka Indian National Congress (INC) ka la pynïakhun 19 ngut ki kyrtong kynthup 12 ngut ha West Jaiñtia Hills District bad 7 ngut ha East Jaiñtia Hills District.
Ka United Democratic Party (UDP) ka pynïakhun 16 ngut ki kyrtong kynthup 11 ngut ha West Jaiñtia Hills District bad 6 ngut na East Jaiñtia Hills District.
Ka Bharatiya Janata Party (BJP) ka pynïakhun 5 ngut ki kyrtong kynthup 2 ngut ha West Jaiñtia Hills District bad 3 ngut ha East Jaiñtia Hills District.
Ka HSPDP ka pynïakhun 2 ngut ki kyrtong na East Jaiñtia Hills District. Katba ki kyrtong shimet ne Independent Candidate ki long 17 ngut kynthup 11 ngut ha West Jaiñtia Hills District bad 6 ngut ha East Jaiñtia Hills District.
La synran ïa ki kyrtong da ki nongkyrshan bad ynda haba ki kyrtong ki la mih noh na DC ophis, ki nongkyrshan ki la kynhoi risa ryngkat ka jingkaweh ïa ki lama.
Na ka daw ka jingbun palat jong ki nongkyrshan bad ka jingbym don kano-kano ka jingpyrkhing ka la wanrah ïa ka jingdkoh ha ka leit ka wan ki paidbah ha nongbah Jowai kumjuh ha Khliehriat.