Shillong, Rymphang 03
U kyrtong ka United Democratic Party (UDP) na Mawkynrew Konstitwensi, Bah Kansing Lynshiang ha ka 3 tarik Rymphang, 2025, u la leit ban thep kyrteng ïalade ha Inter-State Bus Terminus (ISBT) kaba don ha Mawlai-Mawïong na ka bynta ban aireng ha ka ilekshon MDC sha ka Khasi Hills Autonomous Dis-trict Council (KHADC) ka ban long ha ka 21 tarik Rymphang, 2025.
Haba kren sha ki lad pathai hadien ba la dep thep kyrteng, u la ong ha ka jingïohi jong u ba hapoh ka Mawkynrew konstitwensi ki paidbah nongshong-shnong ka thaiñ naduh ki snem ba la leit noh, ki angnud ban ïoh ïa uwei u MLA bad uwei u MDC ki bym dei satia na kajuh ka longïing-longsem.
“Naduh u snem 2014 bad haduh u snem 2019, ka rai ksan jong ki nong Mawkynrew ka pyni ba ki kwah ba uwei u MLA bad uwei u MDC bad kim kwah na kawei ka longïing”, ong u Bah Kansing.
Kumba ka long mynta, u MLA ka thaiñ u dei Bah Banteidor Lyngdoh katba ka kurim jong u pat ka Kong Amanda Pakynteiñ kan ïakhun ïa ka MDC kum ka kyrtong jong ka National Peoples’ Party (NPP).
U Bah Kansing u la ong ba ka jingmih jong u ban ïakhun ïa ka ilekshon MDC ka dei namar ka jingthrang jong u ban shakri ïa ka konstitwensi khamtam ïa u duk-u suk da kaba kyrmen ruh ba un lah ban poi sha ka thong ha kane ka ilekshon namar u MLA barim ka konstitwensi kata u Bah Remington Pyngrope u don ryngkat ha syndah bad ban ai ïa ka jingkyrshan kaba radbah.
“Nga don ïa ka thong ban jop bad ka dawbah ka long ba ha ka Mawkynrew konstitwensi, bunsien ki nongshong-shnong ki jied ïa ka seng trai ri-trai muluk bad nga ïeng ha ka shap jong ka bom bad ki paidbah kin ai ka jingkyrshan ïa ka UDP”, ong u Bah Kansing.
U la bynrap ruh da kaba ong ba ki paidbah ka thaiñ ki thrang ban pynjop ïa u ha kane ka kynti namar ba u dei u trai shnong.
