Ki paidbah ki la sngewsih ba nga leit sha ka NPP, nga kwah ban panmap halor kata: Teibor

Kita ki dei kiba ngi donkam ban pynkhlaiñ wat la ki don ki jingpyrshang jong kiwei pat ban pynthut ïa ka rukom pynïaid shnong pynïaid thaw", la ong u MDC.

Shillong, Rymphang 03

U MDC ba mynta ka Mawlai konstitwensi, Bah Teiborlang Pathaw, u la panmap na ki paidbah nongshong shnong ka Mawlai ba u la leit pynïasoh sha ka National People’s Party (NPP) ha u snem 2023, kaba la pynsngewsih pat ïa ki, bad pynskhem ba mynta u la pyndkut lut ïa ka jingïadei bad ka NPP.

“Hooid, ha u snem 2023 ki paidbah ki lah ban don ka jingsngewsih na ka jingleit jong nga sha ka NPP. Na ka liang jong nga, nga kwah ban panmap na ki paidbah halor kata bad kumba ki la pynpaw ba ki kwah ïa nga ban ïakhun kum u kyrtong shimet, kumta nga kloi ban leh kumba ki kwah”, la ong u Bah Pathaw haba kren ha ka Lah Sngi U Blei, hadien ba la dep ban bishar ïa ki kot ki sla jong ki kyrtong MDC.

U la ong, kumba u la kren barabor ba dei u briew uba trei ym ka seng, bad lada ki paidbah ki ailad ïa u sa shisien ban long u nongmihkhmat un trei shitrhem bad trei shitom na ka bynta ban kyntiew ïa ka shnong Mawlai.

Haba kylli, ba ka don ka jingkynnoh ba un sa leit rung biang sha ka NPP hadien ba la jop ïa ka ilekshon. U MDC ka Mawlai u la ong, “Nga lyngngoh ïa kita kiba ong kumta, ngam tip ki ïohi kumno ïa ka dohnud jong nga, hynrei kaei kaba nga la rai bad ki paidbah, hadien ba nga la jop ruh ngan shim beit ïa ka rai na ki paidbah. Lada nga hap ban shong marwei ruh ngan shong beit, tangba nga hap ban trei na ka bynta ka bit ka biang ki paidbah ka shnong Mawlai”.

Ha kane ka sngi bishar ïa ki kot ki sla, u Bah Pathaw uba la mih ban ïakhun kum u kyrtong shimet u la ïathuh ba u la jied ïa ka shap jong u Mawbynna ha kane ka ilekshon MDC.

U la ong ba u Mawbynna u ïeng na ka bynta ki Dorbar Shnong namar dei ma ki kiba ïada ïa ka ri bad ka jaidbynriew, wat la ka don ka jingpyrshang ban pynthut ïa ka rukom pynïaid shnong.

“Nga ngeit skhem ba lyngba jong u Mawbynna ngin nang pynskhem ïa ka shnong Mawlai jong ngi ha ka jinglong kyrpang jong ka, khamtam ba ki lai tylli ki mawbyrsiew phi lah ban ïohi ha u Mawbynna, kata ka Dorbar Shnong, Seng Kynthei bad Seng Samla. Kita ki dei kiba ngi donkam ban pynkhlaiñ wat la ki don ki jingpyrshang jong kiwei pat ban pynthut ïa ka rukom pynïaid shnong pynïaid thaw”, la ong u MDC.