Kiwei ki ong wanrah jingkylla, ngi pat ngin wanrah jingïada bad jingpynbha: Hilarius

"Ha ka ilekshon MP, ki paidbah ki ïa 'vote', ngi ai khublei ïa kaba la dep, hynrei kato kaba la dep…ka la dep, mynta ngin hap sdang thymmai," u la ong.

Shillong, Rymphang 03

U kyrtong ka Congress na Mawkynrew konstitwensi, Bah Hilarius Warbah ha ka Lah Sngi U Blei u la ban jur halor ka jingdonkam ban ïada ïa ka District Council da kaba pynkhlaiñ bad pynbha shuh-shuh ïa Khyrnit ba Hynriew jong ka Riti Synshar ka Ri. 

“Kiwei-kiwei ki ong ban wanrah ïa ka jingkylla, ngi pat ngin wanrah ïa ka jingïada – ban ïada ïa ka District Council. Ngi dang donkam ïa ka District Council, ban nang pynkhlaiñ bad pynbha kumba la kren da ki nongïalam jong ngi,” ong u Bah Warbah hadien ba la dep thep kyrteng na bynta ka ilekshon ban wan sha ka KHADC ha ISBT, Mawïong.

Ha kajuh ka por, u la ong ba ki dang bun ki bynta jong ka Khyrnit ba Hynriew kiba dang hap pynskhem shuh-shuh, khamtam haba ïadei bad ka bor jong ki Rangbah Shnong lem bad kiwei-kiwei ki bynta kaba ka District Council kan dang ai bor shuh-shuh ïa ki ban synshar.

“Katkum ka Khyrnit ba Hynriew, la ai bor ïa ka District Council ban jied ïa u Syiem, la ai bor ïa u Syiem ban jied ïa ki Rangbah Shnong, Sordar…ïa kane ka bynta ngi dang donkam shuh-shuh ban pynkhlaiñ ynda ngi wan ha ka bor bad ngin wan ha ka bor namar kumba ka long mynta, ka lyer jong ka Congress ka ber baroh sawdong bad ngin jop bun ngut,” ong u Bah Warbah.

Haba pynpaw ka jingkyrmen skhem ban poi sha ka thong, u la ong ba katkum ka jingïaid ka por mynta, ki paidbah khamtam ki ‘riew tymmen bad rangbah ki dawa ïa ka Congress ba kan wan biang ha ka bor sa shisien namar ki ong ba ha ka por ba synshar ka Congress ka don beit tang ka suk ka saiñ bad kumta ter-ter.

Haba kylli, u la ong, “Kiba bun kiba thymmai kin wan sha ngi namar ma ki ruh ki la sdang ban tip ba ha ka por mynshuwa ka bit ka biang hynrei ha kine ki por ba mynta la jan dap 10 snem, shibun ki kam khamtam na ka liang ka Sorkar, kaba u paidbah nga peit um da sngewtynnad.”

Haba ban biang ba ka mat treikam jong u ha kane ka ilekshon kan long beit katkum ki mat treikam ka seng, une u kyrtong u la ong ba ka seng ym tang ba kan ai ka jingïada hynrei kan ai ruh ka jingpynbha.

Shuh shuh haba jubab, u la bynrap, “Ka ilekshon MP bad ka ilekshon sha ka District Council ki ïapher bak-ly-bak…ha ka ilekshon MP, u paidbah lehse um ïakynduh mar-met bad u kyrtong hynrei ha ka MDC pat bun ki paidbah kiba ïakynduh mar-met ha ka jingtreikam, bad ki paidbah ki kham sngewjan.”

“Ha ka ilekshon MP, ki paidbah ki ïa ‘vote’, ngi ai khublei ïa kaba la dep, hynrei kato kaba la dep…ka la dep, mynta ngin hap sdang thymmai,” u la ong.