
Shillong, Rymphang 03
U President ka All Meghalaya Poultry Supplier and Retailer Association (AMPSRA), Bah Wanshai Kharshandi ha ryngkat ka jingsynran lang ka Nongaitktien ka seng, Kong Monisha Lyngkhoi u la kyntait war ba um don bynta eiei ruh ban dawa pisa na ki kali kit syiar kumba u la shah kynnoh.
Haba kren bad ki nongthoh khubor, na ka liang u Bah Wanshai Kharshandi u la ong ba ka jingleit jong u bad ka kynhun sha Byrnihat ka long ban buddien ïa kawei ka kali kaba wan na Assam ïa kaba ki la ïoh ban bat ha Mawlai kaba kit ïa shiteng ki syiar ïap bad shiteng pat kiba im.
Ha kane ka jingïohbat, na ka liang ka kynhun ka la pyntip ruh sha ka tnad ba dei khmih bad sha ka tnad Pulit ba kin leh ïa kaba donkam.
“Ka jinghiar jong ka kynhun sha Byrnihat ka long hadien ba ki la ïoh jingujor kaba man ka por na ki para nongkhaïi ha kaba ïadei bad ka jingshim kabu bad ka jingïoh ïaid laitlan. Kumta ka seng ha ka 24 tarik Kyllalyngkot ka la leit sha Byrnihat ban ap ïa ki kali kit mar kiba wan na Assam la ki don ne em ïa ka syrnot pyntikna ba ki syiar ki long kiba bit ban bam.”
U Bah Kharshandi u la ong ruh ba na ka liang ka seng kam don kano-kano ka jingkhang ïa ki kali kit syiar kiba wan na Assam, kiba biang ïa ka syrnot (Fitness Certificate) bad kiba bud ryntih ïa ki SOP ba la ai da ka tnad Veterinary .
“Nga wan ban pynshai hadien ba mih khubor ha ki katto-katne ki ‘Social Media’ kaba la pynthohbria ïa ka kyrteng jong nga ha ka ban lum pisa be-aiñ hynrei kane kam long kaba shisha.”
Shuh shuh u la bynrap ba ka jingdon jong u ha katei ka sngi ka long tang ban khmih bniah la ki kali kiba wan na Assam ki don ne em ïa ki kot ki sla kiba biang bad bud ïa ki SOP ba la ai da ka Tnat Veterinary.