Kyntait u MLA Sohïong ba don ka jingïapher jingmut shi ïing shi sem

Ha kane ka sngi ïa u Bah Synshar uba dei ruh MLA ba mynta ka Sohïong konstitwensi la wan ban synran da ki bahaïing ryngkat bad ki nongkyrshan jong u.

Shillong, Rymphang 03   

U MLA ka Sohïong konstitwensi ba dei ruh kyrtong ban ïa aireng ha kane ka ilekshon MDC sha ka Khasi Hills Autonomous District Council (KHADC), Bah Synshar Kupar Roy Lyngdoh Thabah, u la ong ba kam don kano-kano ka jingïapher jingmut, hynrei baroh ki don la ka jong ka jingkwah ban ïakhun ïa ka ilekshon.  Ïa kane u la pynpaw hadien ba u la leit ban thep kyrteng ïalade hakhmat u Returning Officer, Bah P.T. Passah ha DC Ophis, Shillong.

Ha kane ka sngi ïa u Bah Synshar uba dei ruh MLA ba mynta ka Sohïong konstitwensi la wan ban synran da ki bahaïing ryngkat bad ki nongkyrshan jong u.

Ha ka jingïakren bad ki nongthoh khubor hadien ba la dep ban thep kyrteng, na ka liang u Bah Synshar u la ong ba ym don pisa ban thied ïa ki paidbah hynrei u thied ïa ki paidbah da ka jingieid.

“Lada ki paidbah ka Nongspung-Sohïong kin jied ïa u ban long kum u MDC, u la kular ban pynkhlaiñ shuh shuh ïa ki aiñ kiba la don lypa hapoh District Council bad ki Hima kata ka Hima Nongspung bad ka Hima Sohïong bad ka don ruh ka shnat Hima ha Nongwah Mawtamur kaba dei khappud bad ka Assam, da kaba u kwah ba ki nongshong shnong ha katei ka jaka kin shongsuk shong shngaiñ”, u la pynpaw.

Shuh shuh u la ong, ” Ki mat kiba hakhmat eh kiba u buh ki long, ban ai bor ha ki Dorbar Shnong ba ki lah ban peit kham bha ha kaba ïadei bad ki kam shnong  bad kin sa rah pat sha ka District Council, ban peit ïa ka khuid ka suba kaba dei ruh ka solid waste management bad u kwah ba ki shnong ki hima, ki elaka kiba don hapoh District Council ki dei ban don ïa ki pud ki sam kiba biang (Proper Boundary) bad ka jingpynwandur kaba biang (Proper Maping)”.

Ha kaba ïadei bad ki jingmih khubor ba ka don ka jingbym ïa sngewthuh jingmut bad u Bah Nathaniel  (khun Bah HDR) ba u hap ban ïeng ïakhun hi ha kane ka ilekshon, na ka liang u Bah Synshar u la jubab da ka ba ong, ba kum kata kam don ban ong ban ïapher jingmut, hynrei baroh ki don la ka jong ka jingkwah ban ïakhun ïa ka ilekshon namar kane ka dei ka Ri synshar paidbah, nalor kata u la kyntait ruh, ba kam don ka jingïapra shi ïing  shi sem halor ka jingïakhun shi bakha trai.

Nalor kane, u Bah Synshar u la pynpaw ruh ba ym lah ban thied ïa u paidbah da ka dor jong ka pisa hynrei tang da ka jingieid kaba ki paidbah ka Sohïong ki ai ïa u, ka ïing jong u bad ka seng. U la pynpaw ruh ba kum  ha ka ilekshon MLA ba la dep ha kaba ym lah ban thied  ïa u paidbah da ka pisa hynrei ka ïing jong u ka thied da ka jingieid ïa u paidbah ka Sohïong konstitwensi. 

U Bah Thabah  u la ong ruh ban na ka liang ka jong u, u pan ïa ka jingkyrshan na ki paidbah bad na ka liang jong  u bad  ka seng kin trei shitom ban ïoh ïa ka jingjop ha kane ka ilekshon MDC. U la ong ruh ba na ka liang jong u, u burom ïa baroh ki seng saiñpyrthei kiba mih ban ïakhun ha kane ka ilekshon bad um kwah ban kynthoh ïa kiwei pat ki seng hynrei u pynpaw shai ba un kren beit tang ïa ki mat jong ka seng UDP .