Mawkyrwat, Rymphang 03
Ka ilekshon ban jied ïa ki nongmihkhmat sha ka ïingdorbar thawaiñ jong ka Khasi Hills Autono-mous District Council (KHADC) na Langrin Konstitwensi ka la nang khluit bad itynnad shuh shuh hadien ba u MLA barim ka Ranikor u Martin M Danggo u la kyntait ban ai jingkyrshan ïa ka NPP bad rai ban kyrshan ïa u kyrtong ka Congress Bah Pherdonnam Rngaid ha ka ilekshon MDC.
Kum ban shu pynkynmaw ha kine ki khyndiat sngi ha ka jingthep kyrteng u kyrtong ka NPP Bah Mandilos Nongbri ha DC ophis Mawkyrwat, ka la don ka jingkam na ka liang ki nongïalam ka NPP ba u MM Danggo un ai jingkyrshan ïa ka NPP hadien ba ki nongbud ba syndah jong u ki la wan pynïasoh bad kane ka seng. Hynrei ha ka 3 tarik u Rymphang 2025, katei ka jingkren ka la kylla khongpong hadien ba ïa u kyrtong ka Congress u Bah Pherdonnam Rngaid na Langrin Konstitwensi la wan ban synran hi dalade da u Martin M Danggo bad u Bah Mansturdy Nongrem, CEM barim ka KHADC ha ka por ba u leit thep kyrteng kum u kyrtong ban ïakhun ïa ka ilekshon MDC ka ban long ha ka 21 tarik.
U MM Danggo haba kren sha ki lad pathai khubor u la ïathuh ba hadien ba u la iehnoh ïa ka BJP, u la rai ban ai jingkyrshan ba pura ïa u kyrtong ka Congress ha kane ka kynti ba mynta, wat la um pat rai ban pynïasoh ïalade sha kane ka seng.
U la ong ruh ba un ai mynsiem bad ai jingkyrshan ïa une u samla namar u ïohi ba wat la u dang khynnah ruh hynrei u don shisha ka mynsiem ban shakri ïa u paidbah khamtam ïa ka konstitwensi kaba dang sahdien.
Kiwei kiba thep kyrteng ha kane ka sngi ki long u Bah Medalsing Lyngdoh kyrtong ka Congress, Bah Baristar Paul Thyrniang kyrtong ka Khun Hynñiewtrep National Awakening Movement (KHNAM) ki ban ïakhun na Mawkyrwat Konstitwensi, u Bah Lewis Janong Sooting kyrtong ka Bharatiya Janata Party (BJP) na Langrin Konstitwensi.
Ïa u Bah Medalsing Lyngdoh la wan ban synran lang da u Bah Mansturdy Nongrem, Bah Kynpham V Kharlyngdoh, President District Congress Committee bad kiwei kiwei.
