
Nongstoiñ, Rymphang 03
Sa khathynñiew sngi shwa ba ki paidbah nongshong shnong jong ka West Khasi Hill kin sa ïoh ban leit ïashim bynta ban pyndep ïa la ka hok ban jied ïa u ne ka nongmihkhmat sha ka ïingdorbar jong ka Khasi Hills Autonomous District Council, ki la don haduh 19 ngut ki kyrtong na ki lai tylli konstitwensi ha West Khasi Hills na ki seng saiñpyrthei bapher bapher kynthup ïa ki kyrtong shimet kiba la mih shakhmat ban ïa aireng ha kane ka ilekshon MDC.
Na kine 19 ngut ki kyrtong, 6 ngut kin ïakhun na Nongstoiñ ba kynthup ïa ka Kong Badariti Lyngdoh Nong-lait na ka HSPDP, Bah Dressar Marngar na ka NPP, Bah G Ningstar Marthong na ka INC, Dr. Juristman Iawphniaw na ka VPP, Bah Demendar Lyngdoh na ka BJP bad u Bah Micheal Thongni kum u kyrtong shimet.
Na ka Mawshynrut District Council Consti-tuency ki don 7 ngut bad kine ki kynthup ïa u Bah Srally Rashir na ka HSPDP, Bah Gardinal Sohshang na ka NPP, Bah Kodang Rashir na ka Congress, Bah Sranly Rongrin na ka UDP, Bah Roland Mawsor na ka BJP, u Babu Birbor Riangtem na ka VPP bad Bah Jomping Pangniang kum u kyrtong shimet.
Katba ha Rambrai Jyrngam District Council Constituency ki don 6 ngut bad kine ki kynthup ïa u Bah Kimfa Sydney Marbaniang na ka NPP, Bah KP Pangniang na ka HSPDP, Bah Lurshai Kharbani kum u kyrtong shimet, Bah Bormanding Nonglang na ka Congress, Bah Boney Lyngdoh na ka VPP bad u Bah Dominic Wahlang na ka BJP.
Halor kane ka ilekshon MDC kaba mynta, haba phai sha ka Nongstoiñ konstitwensi kan long lehse ka jingïakhun kaba itynnad bad kaba shongshit tam ha kaba nalor kiwei pat ki kyrtong kiba la pyndep ïa ka jingthep kyrteng. Ha ka sngi kaba khatduh u samla Michael Thongni, uwei na ki samla rangbah na ka sor Nongstoiñ bad uba la don bynta ruh ban aplai ïa ka tiket na ka VPP, u la leit ban pyndep ïa ka jingthep kyrteng kum u kyrtong shimet ban ïakhun ïa kane ka ilekshon.
Ha kane ka jingleit thep kyrteng jong utei samla, la synran lang ki nongkyrshan, ki bahaïing bahasem, ki ‘riew rangbah bad kiwei kiwei. U samla Michael Thongni u dei ba la pyndep ïa ka jingpule BCA Software Engineer bad u dei ruh u Chief Executive Officer bad Director ka North East Institute of Professional Studies (NEIPS) bad u shong u sah mynta ha ka Dong Nondein, New-Nongstoiñ.
Haba kren bad ki lad pathai khubor, u samla Michael u la ong ba ka jingmih ka jong u ban ïakhun ha kane ka kynti kaba mynta kam dei ba u ïaleh pyrshah ïa ka VPP hynrei kum uwei u nongshong shnong uba thrang ban shakri ïa ki paidbah uba burom ïa ka jingpynsngew pynsngap ki katto katne kiba donkam ïa ka jingshakri ka jong u, u don ïa ka hok ban mih shakhmat ban shakri ïa u paidbah.
“Nga la ju shakri ïa u paidbah ha kiba bun ki bynta lyngba ki kam barit jong nga bad mynta nga kwah ba ki paidbah kin pynkupbor ïa nga ha u khulom, khnang ba u khulom jong nga, un long uba nep ba ngan thoh ïa ki jingtyrwa bapher bapher ki ban wanrah jingmyntoi ïa ki paidbah,” ong u Bah Michael uba la bynrap ruh ba lada u jop un nym ap tang ïa ka skhim na District Council hynrei ba u don ruh ka jingtip ban wad ïa ki kam pynroi na shabar ka jylla.
U la pynbna ruh ba lada jop, 30 percent na ka tulop un ïarap ban pynshna ïing ïa kiba duk basuk bad 20 percent sha ki seng jong ki briew ba duna dkhot met bad ban thaw ruh ki lad ki lynti na ka bynta ki samla ban sengkam lajong khnang ba yn lah ban weng noh ïa ka jingkyrduh kam kyrduh jam. U la pynbna ruh ba ka shap jong u kum u kyrtong khlem seng ka dei ha ka dur jong ka Sngi.
U la pynpaw ruh ba ka thong jong u lada u jop ïa kane ka ilekshon ka long ban pynkhlaiñ ïa ki Dorbar Kur bad Dorbar Shnong, ban pynneh bad pynkhlaiñ ïa ki riti ki dustur, ban ïasaid na ka bynta ban ïoh ïa ka jinglaitluid ban tih maw tih shyiap, ban wanrah ïa ka roi ka par, ban ïakhun lyngba ka bor jong ka District Council ban pynïoh ïa ka jaka pule khlem donkam jingsiew ha ka kyrdan klas-X bad klas -XII na ka bynta kiba duk ki bym ïohlad ban leit pule bad na ka bynta kiba duna dkhot met.
U la ong ruh, “Ngam don kam ban hikai ïa u paidbah namar u paidbah u dei u nongbishar u nongaibuit nongaibor, ka shong ha ka jingstad jong u paidbah ban jied ïano,” bad bynrap ruh da kaba ai khublei kitbok kitrwiang ïa baroh ki kyrtong ki ban ïakhun ha kane ka ilekshon MDC ba kin ïoh ïa ka met kaba koit ba khiah.