Shillong, Rymphang 03
U kyrtong ka Congress na Nongkrem Konstitwensi, Bah Lambor Nongrum, u la leit ban thep kyrteng ïalade hakhmat ka Returning Officer (RO) ha ka 3 tarik Rymphang, 2025 ban ïakhun ïa ka ilekshon MDC sha ka Khasi Hills Autonomous District Council (KHADC) ka ban long ha ka 21 tarik Rymphang, 2025.
Ha ka jingïakren bad ki lad pathai khubor hadien ba la dep thep kyrteng, u Bah Lambor u la ong ba ha kane ka kynti kaba mynta, u don ïa ka jingsngew skhem ban jop ha kane ka ilekshon namar ba ka dei ha ka sien ba lai ba u la mih ban aireng biang sa shisien ïa ka ilekshon MDC hadien ba u la dep ban ïakhun ïa ki ar tylli ilekshon MDC ha ki por ba la dep.
“Nga don ïa ka jingsngewskhem ha kane ka sien kaba mynta namar ba ka la dei lypa ha ka sien kaba lai ha kaba nga la ïakhun ïa ar tylli ki ilekshon MDC. Nga la long ba-ar bad kane ka dei ka sien ba lai bad ha kajuh ka por ruh, nga ïohi ba ha ka ilekshon banyngkong bad ba-ar, ka la kham nangkiew bad nga ngeit ba ha kane ka sien ba lai, ki paidbah kin ai ka jingkyrshan ïa nga”, ong u Bah Lambor.
Na ka Nongkrem Konstitwensi, ki don tang 3 ngut ki kyrtong ban aireng ha kane ka ilekshon MDC kiba kynthup ïa u MDC ba mynta, Bah Lambor Malngiang kum kyrtong shimet, Bah Kitbor Syiem kum kyrtong ka Voice of the People Party (VPP) bad Bah Lambor Nongrum na ka Congress.
U la ong ba ki paidbah ka thaiñ ki la dei ban ailad noh bad pynthymmai noh ïa u MDC na katei ka thaiñ namar ba u MDC ba mynta, Bah Lambor Malniang u la ïoh ban synshar haduh 15 snem kum MDC ka thaiñ bad 10 snem kum u MLA.
“Nga ngeit ba ha kane ka kynti ba mynta, ki paidbah kin pynthymmai noh da kaba ailad ïa nga sa shisien pat ba ngan long kum u MDC na katei ka thaiñ”, ong u Bah Lambor.
Haba ïadei bad ki mat-ki jura ba un rah sha ka District Council ynda u la ïoh ïa ka jingjop kum u MDC, u Bah Lambor u la ong ba lada ka Congress ka wan ha ka bor synshar, u don ïa ka jingthmu kaba bha ban synshar na ka bynta ka jingbha ka konstitwensi, ka ri bad ka jaidbynriew hi baroh kawei da kaba bynrap ruh ba ym donkam shuh ban pynkylla ïa ki aiñ kiba la don lypa namar bun na ki aiñ, ki la don lypa ha ka khyrnit ba hynriew hynrei kaba donkam ka long ban dang ïai pynbha shuh-shuh ïa kitei ki aiñ kiba la don lypa.
“Ym da donkam shuh ban ong ba ngin pynkylla hynrei ngi donkam ban pynbha shuh-shuh ïa kane ka khyrnit ba hynriew kaba ngi la don lypa”, ong u Bah Lambor.
Halor ka jingong u MDC ka Nongkrem konstitwensi, Bah Lambor Malngiang ba ka jingïakhun jong u ha kane ka ilekshon MDC ka long beit pyrshah ïa u President ka VPP Bah Ardent Miller Basaïawmoit ym ïa u kyrtong ka seng uba aireng na katei ka konstitwensi, u Bah Lambor Nongrum u la ong ba ha u shimet hi, ka jingïakhun ka long beit pyrshah ïa u kyrtong ka VPP kata u Bah Kitbor Syiem bad ïa u MDC ba mynta, Bah Lambor Malngiang.
“U MDC ba mynta u ong ba ka jingïakhun kam dei bad u kyrtong ka VPP hynrei nga shim ba ka jingïakhun ka dei bad u kyrtong ka VPP bad u MDC ba mynta. U MDC ba mynta jong ngi, u ong ba ka jingïakhun ka dei bad u President ka seng, Bah Ardent, hynrei kata ka dei ban long noh ka jingïakhun ha u 2028 namar mynta u kyrtong ka VPP u dei u Bah Kitbor Syiem, kata ka mut ka jingïaleh jong nga ka dei hapdeng u Bah Kitbor Syiem bad u Bah Lam,” bynrap u Bah Lambor.
