Tura, Rymphang 03
Ki pulit ka East Garo Hills ha ka Lah Sngi U Blei, ki la kem noh ïa uwei u lehnoh barim ka ANVC-B namar ka jingdon jong u ïa ka pistol (kaba la kurup noh) kaba be-aiñ bad kaba khlem laisen.
Katkum ka jingïathuh u heh pulit ka East Garo Hills, Bah S.A. Rynjah, la pynlong ïa ka jingkhynra kaba kyrpang hadien ba la ïoh ïa ka jingtip kaba tikna ha kaba, la kem noh ïa utei u lehnoh barim-Mexbal K. Marak, ba la tip kum u Menil (44 snem ka rta).
Ïa u Marak la kem na ka shnong Silchanggittim kaba hap hapoh thanat Rongjeng.
“La kem ïa u na ka jaka kaba la tip kum ka Baringgre Chambildam bad la ïoh kurup ïa kawei ka pistol 7.65 mm (ba shna ha China) na kti jong u”, la pyntip u Bah Rynjah.
Katkum ka jingong ki pulit, ka jingtohkit ba nyngkong ka la pyntikna ba u Marak u dei dkhot jong ka ANVC-B, uba la rung sha katei ka seng ha u snem 2008. U long ruh uwei napdeng kito kiba la wan pyndem noh ha ka por ba ïasoi ïa ka jingïateh kular ha u snem 2015.
Ka jingshah kem jong u Marak ka long hadien jong kawei pat ka jingjia ba ïadei bad ka jinglap ïa ki tiar ïaleh na katei kajuh ka distrik, katto-katne sngi mynshuwa.
Ha katei ka jingjia kaba kham hashuwa, la ïoh kurup kumba 100 tylli ki kuli kynthup ïa ki ‘mortar shell’ kiba dei jong ka GNLA (ka bym don shuh mynta) na kawei ka khlaw ha Rongjeng.
