T.10,440 klur la mang na ka bynta ki projek ba ïadei bad ki kam rel ha ka thaiñ Shatei Lam Mihngi

U Vaishnaw u la ban jur ba naduh u snem 2014, la siang 1824 kilometer ki lynti rel ba thymmai, kaba la tam ïa baroh ki lynti rel ba don ha Sri Lanka.

Shillong, Rymphang 03

U Myntri ka tnat Rel, Ashwini Vaishnaw u la pynbna ïa ka mang tyngka kaba T.10,440 klur na ka bynta ka jingkyntiew ïa ki jingdon jingem ba ïadei bad ki kam rel ha ka thaiñ shatei lam-mihngi kaba long ka jingkiew ba kongsan ha ka jingbei tyngka na ka bynta ka thaiñ.

Ïa kane, u Myntri u la pynbna haba ïakren bad ki lad pathai khubor na ka thaiñ shatei lam-mihngi lyngba ka internet ha ka Lah Sngi U Blei ban ïamir jingmut ïa ki projek jingdon jingem ba ïadei bad ki kam rel ba la kdew ha ka Mang Tyngka 2025-26 jong ka Sorkar Pdeng.

U Vaishnaw u la ong ba ka tnat rel jong ka ri kan bteng ban pynïar ïa ka leit ka wan lyngba ki rel kaba kham sted, kaba kham shngaiñ bad kaba kham suk ha kylleng ka ri ha ka jingmang tyngka kaba palat T.2.65 lak klur na ka bynta ar snem kynthih. Ka tnat Rel ka thmu ban sdang 200 tylli ki rel Vande Bharat ba thymmai, 100 tylli ki rel Amrit Bharat bad 50 tylli ki rel Namo Bharat, ki ban ai jingshakri ïa ki jingdonkam jong ki nongshong shnong kiba kham duna ka ïoh ka kot bad kiba pdeng ka ïoh ka kot. Shuh shuh, ka jingshna 1000 tylli ki flyover ba thymmai bad ki ‘underpass’ kan kyntiew shuh shuh ïa ka jingshngaiñ ha kylleng ka ri.

Ha ka jingai jingkren jong u, u Myntri u la ïaroh ïa ka jingïaid shaphrang ki projek rel ha ka thaiñ shatei lam-mihngi, wat hapdeng ka sohsat na ka long ka man ki jaka. U Vaishnaw u la ban jur ba naduh u snem 2014, la siang 1824 kilometer ki lynti rel ba thymmai, kaba la tam ïa baroh ki lynti rel ba don ha Sri Lanka. Shuh shuh, la shna 478 tylli ki flyover bad ki ‘underpass’ ba thymmai ha ki jylla ka thaiñ shatei lam-mihngi. Shuh shuh, ka jingpyntreikam ïa ki lad pynshngaiñ ‘Kavach’ ha 1189 kilometer ka dang ïaid shaphrang.

Ki General Manager jong ka Northeast Frontier Railway (NFR), Chetan Kumar Shrivastava bad u Arun Kumar Choudhary, kiba la ïadonlang ha kane ka jingïalang, ki la ai jingtip ba yn pynthymmai 92 tylli ki steshon ha ka thaiñ hapoh ka skhim Amrit Bharat Station. Ka jingpynkylla ïa ki lynti rel sha ka bording ilektrik hapoh u pud u sam jong ka NFR la antad ban pyndep shwa u Nohprah 2025 bad la pynkhreh ban pyndep ïa ka projek Bhairabi-Sairang ha Mizoram shuwa u Naitung 2025.

Ka jingmang tyngka T.10,440 klur na ka bynta ki jingdon jingem ba ïadei bad ki kam rel ha ka thaiñ shatei lam-mihngi ka long palat san shah ka jingkiew ban ïa kaba ju pynbiang kaba T.2,122 klur ha ka samoi 2009-2015. Kane ka jingkiew kan kyrshan ïa ki projek ba kongsan, ba kynthup ki lynti ba thymmai, ka jingpynthymmai ïa ki lynti rel, ki lad pynïaid kali, ki jingpynshngaiñ ha ki surok, ki jingshna jingkieng, ki lad jingai jingtip bad ki jingai jingshakri ba kham bha ïa ki briew.