
Shillong, Rymphang 04
Ar ngut ki kynthei ki la shah thok pisa da ki lak tyngka ha uwei u briew uba leh mynleh ban pynïoh kam ïa ki ha ka tnat Koit-Khiah hapoh ka Jylla.
Katkum ka khubor ba la ïoh na ki pulit la ong ba kine ar ngut ki kynthei kiba dei ki nongshong shnong na West Garo Hills ki la ai lang ka jingujor ba uwei u briew ba la tip kyrteng kum u Armo Sangma u la thok pisa ïa ki haduh T.1.82 lak bad T.1.4 lak, halor ka jingleh mynleh ban pynbiang ka kam ïa ki hapoh ka tnat Koit-Khiah ha Meghalaya.
Shuh shuh, na ka liang jong kine nongujor ki la ong ruh ba utei u briew u la soi thok ruh ïa ka ‘Call Letter’ ne ka shithi thungkam jong ka Directorate of Health Services (MI), East Khasi Hills, Meghalaya.
Ha kawei pat ka khubor, uwei u briew na ka shnong Pathuri ha Assam u la ujor ba ha u snem 2024, uwei u briew na kajuh ka shnong u la thok pisa ïa u haduh T.3.5 lak. Kumta na ka liang ki pulit ki la ïoh ban kem noh ïa une u briew.