
Shillong, Rymphang 04
Ki kyrtong kiba la mih ban aireng ha kane ka ilekshon MDC ki don haduh 272 ngut ha baroh ar tylli ki Autonomous District Council, ba kynthup 158 ngut sha Khasi Hills Autonomous District Council (KHADC) bad 114 ngut sha Jaiñtia Hills Autonomous District Council (JHADC), hadien ba la kynran dien noh 3 ngut.
Ki kyrtong kiba la mih sha madan ban ïakhun ïa ka ilekshon MDC sha KHADC ki kynthup haduh 12 ngut ki kynthei bad 146 ngut ki shynrang. Ha East Khasi Hills ki don 6 ngut ki kynthei, 3 ngut na Ri-Bhoi, bad mar iwei na Eastern West Khasi Hills, West Khasi Hills bad Sohra Sub Division.
Napdeng 158 ngut ki kyrtong, haduh 83 ngut ki dei kiba ïakhun na ki konstitwensi kiba don ha East Khasi Hills, 26 ngut na Ri-Bhoi, 19 ngut na West Khasi Hills, 11 ngut na South West Khasi Hills, 10 ngut na Sohra Sub Division bad 9 ngut na Eastern West Khasi Hills.
Lah ban kdew ba ha JHADC ki don haduh 117 ngut ki kyrtong ba la thep kyrteng, hynrei lai ngut ki la kynran dien noh na ka jingïakhun, kaba pynsah mynta satang 114 ngut ki kyrtong.
Napdeng ki kyrtong kiba la mih ban aireng sha JHADC 7 ngut dei ki kynthei. Na ki 114 ngut ki kyrtong, 60 ngut ki dei na West Jaiñtia Hills, 42 ngut na East Jaiñtia Hills bad 12 ngut na Amlarem Sub Division.
Ki don 58 tylli ki MDC konstitwensi ha Khasi-Jaiñtia; kaba mut mar 29 konstitwensi ha KHADC bad JHADC, bad ka ilekshon sha kine ar tylli ki district council kan long ha ka 21 tarik bad ka jingñiew ‘vote’ kan long ha ka 24 tarik mynta u Rymphang.